Halyqaralyq sarapshylar Qazaqstannyń qan qyzmetiniń damýyna joǵary baǵa berdi
ASTANA. QazAqparat - Astanada Transfýzıologııa ǵylymı-óndiristik ortalyǵynda «Klınıkalyq transfýzıologııanyń teorııalyq jáne tájirıbelik aspektileri» taqyrybynda halyqaralyq ǵylymı-tájirıbelik semınar bolyp ótti.
Semınarǵa AQSh, Ulybrıtanııa, Reseıdiń qan qyzmetiniń basshylary men ókilderi, sondaı-aq donor qany komponentterin daıarlaý jáne klınıkada qoldanýdy júzege asyratyn otandyq dáriger-transfýzıologtar qatysty.
Semınar maqsaty - donor qany men komponentterin qoldaný tıimdiligin arttyrý, negizsiz qan transfýzııasy sanyn azaıtý jáne qaýipsizdikti qamtamasyz etýde qazirgi tehnologııalardy engizý jaıyn talqylaý.
Semınarda sóz sóılegen halyqaralyq sarapshylar qazirgi zamanǵy ádister jáne qan qoryn basqarý sheshimderi, qan komponentteriniń patogendik qaýipsizdigi jáne ımmmýnologııalyq problemalar týraly áńgimeledi.
Transfýzıologııa ǵylymı-óndiristik ortalyǵy qyzmetimen tanysqan sheteldik mamandar respýblıkadaǵy qan qyzmetiniń damýyna joǵary baǵa berdi.
N. Pırogov atyndaǵy Ulttyq medıtsınalyq hırýrgııa ortalyǵynyń prorektory, bas transfýzıology, m.ǵ.d., professor E.Jıbýrt (Máskeý, Reseı): «Qazaqstan TMD elderi ishinde alǵashqy bolyp donor qanyn transfýzııalyq ınfektsııaǵa qatysty eki satyda skrınıngileý ádisin engizip, ony búkil el aýmaǵynda qoldanýdy zańmen bekitti. Bul qan qaýipsizdigin qamtamasyz etýde óte mańyzdy jaıt. Sondaı-aq, respýblıkada transfýzıologııanyń qazirgi zamanǵy tehnologııalary belsendi engizilip jatqanyn kórdik»,-deıdi.
Amerıka Qyzyl aı qoǵamynyń medıtsınalyq dırektory, Soltústik Amerıka boıynsha Halyqaralyq transfýzıologtar qaýymdastyǵynyń aımaqtyq bóliminiń dırektorlar keńesiniń múshesi, Djordj-Taýn ýnıversıtetiniń professory Rıchard Bendjamen (Vashıngton, AQSh) óz kezeginde Qazaqstan bul salada óńir elderine úlgi bola alatynyn aıtty, dep habarlaıdy Transfýzıologııa ǵylymı-óndiristik ortalyǵynyń baspasóz qyzmeti.
