Halyqaralyq sarapshylar qazaqstandyq muǵalimderdiń jalaqysyn kóterýdi usyndy
ASTANA. 7 qazan. QazAqparat - Jetekshi halyqaralyq uıymdar, otandyq jáne batystyń joǵary oqý oryndarynyń sarapshylary men ǵalymdarynan quralǵan top Nazarbaev Ýnıversıtetinde Qazaqstannyń bilim salasyna baılanysty júrgizilgen aýqymdy zertteýlerdiń nátıjesimen tanystyrdy, dep habarlady osy oqý ortalyǵynyń baspasóz qyzmetinen.
«2015-2020 jyldarǵa arnalǵan Qazaqstan Respýblıkasynyń bilim berýdi reformalaýdyń strategııalyq baǵyttaryn ázirleý» jobasyna qatysýshylar bilim berý salasynda sońǵy jyldary júrgizilgen jáne aǵymdaǵy reformalardyń tıimdiligin, sonyń ishinde, mektepke deıingi, orta bilim, kásibı-tehnıkalyq jáne joǵary bilim berý salasyndaǵy oń ózgeristerdi sarapqa salǵan. Joba nátıjesinde alynǵan málimetter básekege qabiletti bilim berýdi qamtamasyz etý maqsatynda júıeni odan ary damytyp, reformalaýǵa qajetti strategııalyq baǵyttardy anyqtaýǵa kómektesedi.
Mektepke deıingi bilim berý sapasyna áser etetin problemalar retinde sarapshylar jalaqy mólsheriniń tómendigin, kásiptiń bedelsizdigin, jumys ýaqytynyń uzaqtyǵyn, oqý josparynyń kóptigin jáne ákimshilik taraptan qysym kórsetiletinin, sonyń saldarynan ustazdar kásibı turǵyda óse almaıtyndyǵyn atap kórsetti.
Ulttyq jáne halyqaralyq deńgeıde orta bilim berýdi odan ary damytý úshin ulttyq standarttardy, oqý baǵdarlamalaryn, pedagogıkany jáne oqýshylar úshin salystyrý, analız jasaý, qoldaný, synaý, saraptaý, túsindirý sııaqty áldeqaıda kúrdeli tapsyrmalardy qarastyratyndaı oqýlyqtardy qaıta qaraý qajet.
Sarapshylar sonymen qatar, orta bilim berýde aýyldyq jerler men qalada oqıtyn balalardyń bilim sapasyna kóńil aýdarý qajet deıdi. Bilim berý sapasynda áli de aýyldyń balalary qalanyń oqýshylaryna qaraǵanda artta keledi. Bilim alýǵa teń quqyq bolý úshin ınfraqurylymǵa ınvestıtsııa tartý, oqytýshylardyń kásibı biliktiligin arttyrý jáne mektepterdi birdeı qarjylandyrý qajet.
Sonymen qatar, jobaǵa qatysýshylar ınternatta ósken balalardyń stıgmatızm, jumyssyzdyq jáne kedeıshilikke tap bolý qaýpi kóbirek degen sheshim shyǵardy.
