Halyqaralyq sarapshylar Astanada ashylatyn ІT-habtyń múmkindikterin tizbektep berdi
TechStar top-menedjeri Krıs Heıvlıdiń aıtýynsha, Astanadaǵy ІT-habtyń mańyzdylyǵy - qaýymdastyqtar arasynda áriptestikti ornatý jáne klıentterge ǵylymı, oqý-pedagogıkalyq kómek kórsetý bolyp tabylady.
«Myńdaǵan adamdy bir shatyr astyna biriktirý úshin ınvestıtsııa talap etedi. Bizde múmkindik kóp, resýrs ta, adamdar da bar. Qaýymdastyqta kásipker osyny júzege asyrý úshin ýaqyt tabýy tıis», - dedi Krıs Heıvlı.
Qazaqstandyq venchýrlik ınvestor Astanada ǵana emes, barlyq óńirlerde de damytý kerektigin aıtty.
«ІT-hab Astanada jańadan ashylady. Bastapqy kezeńde bul qıyn bolady. Almatyda qazir naryq qalyptasqan, oń tájirıbe bar. Qaraǵandy, Almaty óńirlerin, oblys ortalyqtaryn nazardan tys qaldyrmaýdy usynamyn. Tsıfrlandyrý - memlekettik bastama. Bul bastama tek Astanada ǵana emes, óńirlerde de mańyzdy»,- dedi venchýrlik ınvestor Ádil Nurǵojın.
«Skolkovo» qorynyń basqarma tóraǵasy Igor Drozdov Astanadaǵy hab qatysýshylaryna birqatar jeńildikter qarastyrylatynyn aıtyp ótti.
«Bizde ondaı jeńildikter joq. Startap bastamalar da tartymdy. Tek qana kofeınıa emes - mektep, baspana. Bul jerde bastysy, keńseni jalǵa alýda emes, másele servıs spektrinde»,- dedi I.Drozdov.
Mail.ru Group kompanııasy bas dırektorynyń orynbasary Dmıtrıı Sergeev bolsa, Qazaqstanda maman daıarlaý jaqsy damyǵanyn tilge tıek etti.
«Biz Qazaqstanmen birlese hakaton júrgizip, stýdentterdi qashyqtan oqyta alamyz. Tek qana jergilikti aımaqta emes, jahandyq kólemde júzege asatyn jobalardy qolǵa alý kerek. Men osy tájirıbeler Astanadaǵy ІT-habta qoldanylady dep senemin. Jańa tehnologııalardy testileýge barynsha jaǵdaı jasaý kerek. Eger Qazaqstan robottardy testileýdi qolǵa alsa, kóp komanda jasaqtaýǵa bolady», - dedi Dmıtrıı Sergeev.