Halyqaralyq sarapshylar Alakóldiń maýsymdyq merzimin uzartýdy usyndy
TALDYQORǴAN.QazAqparat - Bolashaqta Alakól kólimen Jońǵar Alataý Ulttyq parki birigip jumys isteýi múmkin. Osylaısha týrısterge demalý maýsymynyń ýaqytyn uzartý kózdelip otyr, dep habarlaıdy QazAqparat tilshisi.
Mundaı usynysty AQSh-tan kelgen halyqaralyq konsaltıng ortalyǵynyń sarapshylary usyndy. Kompanııa ókilderi Mádenıet jáne sport mınıstrliginiń arnaıy tapsyrmasy boıynsha týrıstik aımaqtardy damytýdyń jobasyn ázirleýde.
«Demek, Alakól kóline kelgen týrıster tek shomylyp ǵana qaıtpaıdy. Olarǵa Jetisýdyń tamasha tabıǵatyn, taýdaǵy demalysty, flora men faýnasyn kórsetý kózdelip otyr. Negizinen Alakól kóliniń shomylý ýaqyty maýsym aıynda bastalyp, tamyz aıynyń sońyna jetpeı aıaqtalyp qalady. Bul olqylyqty joıý úshin, osy týrıstik aımaqqa jabyq basseınderdi salý kózdelýde. Ázirge bul usynys ǵana», - dedi Almaty oblystyq Týrızm basqarmasynyń basshysy Janar Alshymbaeva.
Basqarma basshysynyń sózinshe, Nıý-Iorkten kelgen «McKinsey» halyqaralyq konsaltıng ortalyǵynyń sarapshylary Alakól kóliniń týrıstik áleýetimen tanysyp, ári qaraı aımaqty damytýdyń master josparyn ázirleıdi. Álemniń 96 memleketinde keńsesi bar tanymal kompanııa Mádenıet jáne sport mınıstrliginiń arnaıy tapsyrmasy boıynsha jumys atqaryp jatyr eken. Olar Qazaqstanda 10 baǵyt boıynsha damytý jobasyn jasamaq, sol jobalardyń ishine Alakól de kirgen.
«Sarapshylar Shyǵys Qazaqstan oblysynyń aımaǵyndaǵy Alakól kólinde de boldy. Olar usynystaryn jasap, tapsyrys berýshige master plandy usynatyn bolady, Bul jobanyń ishine naqty Alakól kólin damytý úshin ne jasaý kerek, qandaı baǵytqa kóńil bólý kerek, barlyǵy kórsetiledi», - dedi J. Alshymbaeva.
Jalpy sarapshylar Almaty oblysyndaǵy Alakól kólinde bir kún bolyp, búgin Taldyqorǵanda arnaıy ákimdik ókilderimen jıyn ótkizdi.
