Halyqaralyq sarapshy ulttyq aldyn alý tetigi aıasyndaǵy jumystarǵa joǵary baǵa berdi

NUR-SULTAN. QazAqparat - Nur-Sultan qalasynda QR Adam quqyqtary jónindegi ýákil Asqar Shákirov Ortalyq Azııadaǵy PRI (halyqaralyq túrme reformasy) ókildiginiń Aımaqtyq dırektory Azamat Shambılovpen kezdesti, dep habarlaıdy QazAqparat Adam quqyqtary jónindegi ýákil ınstıtýtynyń baspasóz qyzmetine silteme jasap.

Kezdesý barysynda ýaqytsha oqshaýlaý, bas bostandyǵyn shekteý jáne aıyrý oryndaryndaǵy adamdardyń quqyqtaryn qamtamasyz etý máseleleri boıynsha pikir almasyldy.

Halyqaralyq sarapshy Qazaqstanda júrgizilip jatqan ulttyq aldyn alý tetigi (UAT) sheńberinde joǵaryda kórsetilgen baǵyttaǵy jumysqa joǵary baǵa berdi. Ombýdsmenniń úılestirýshi róli kezindegi UAT jumys tájirıbesi, onyń pikirinshe, aımaq elderinde taratý úshin aıtarlyqtaı qyzyǵýshylyq týdyrady.

Osy turǵyda taraptar ulttyq quqyq qorǵaý tetikterin jetildirýdegi, sonyń ishinde Qazaqstanda júrgizilip jatqan qylmystyq-atqarý júıesiniń reformasy aıasynda ekijaqty yntymaqtastyq máselelerin talqylady.

Kezdesý qorytyndysy boıynsha joǵaryda kórsetilgen salada birlesken jobalardy júzege asyrý týraly ýaǵdalastyqqa qol jetkizildi.