Halyqaralyq sambo federatsııasy: Qazaqstandyqtar álemde eń myqtylardyń qatarynda

ASTANA. QazAqparat - Astanada QR Prezıdentiniń júldesi úshin sambodan álem kýbogy kezeńiniń jarystary jalaýyn kóterdi, dep habarlaıdy QazAqparat.

Atap aıtqanda, 6-8 shilde aralyǵynda EKSPO-2017 halyqaralyq mamandandyrylǵan kórmesi aıasynda «Dáýlet» sport kesheninde ótetin osy sporttyq sharaǵa álemniń 16 elinen kelgen sportshylar qatysýda. Barlyǵy 200-den asa samboshy baq synaıdy.

«Búginde sambo álemde belsendi túrde damyp keledi. Halyqaralyq sambo federatsııasy quramynda 120 federatsııa qamtylǵan. Atap aıtqanda, qazaqstandyq samboshylar burynǵysynsha álemde eń myqtylardyń qatarynda tur»,- dep atap ótti Halyqaralyq sambo federatsııasy prezıdenti Vasılıı Shestakov.

Óz kezeginde QR Mádenıet jáne sport mınıstri Arystanbek Muhamedıuly Qazaqstan qazirgi kezde shyn máninde sporttyq derjava ekenin aıta kele, «EKSPO-2017» kórmesi aıasynda osy týrnırge eń myqty degen sportshylar tartylǵanyn atap ótti.

Kýbok 9 salmaq dárejesinde erler arasynda (52, 57, 62, 68, 74, 84, 90, 100 kelige deıin jáne 100 keliden asa), áıelder arasynda (48, 52, 56, 60, 64, 68, 72, 80 kelige deıin jáne 80 keliden asa) jáne jaýyngerlik sambodan (52, 57, 62, 68, 74, 84, 90, 100 kelige deıin jáne 100 keliden asa) sarapqa salynady.

Álem kýbogy kezeńinde bas sýdıa Mahmýd Abdýlloevtyń sózine qaraǵanda, jarystyń birinshi kúninde áıelder arasynda 48, 60, 72  keli salmaq dárejesinde, erler 52, 68, 80 kelide, sondaı-aq jaýyngerlik sambodan 57, 74, 100 keli salmaqta tartysqa túsedi.