Halyqaralyq reıtıngtik basylymdarda shyǵatyn qazaqstandyq ǵalymdardyń maqalalary 34 paıyzǵa ósti
ASTANA. QazAqparat - Álemniń belgili basylymdarynda qazaqstandyq ǵylymı maqalalarynyń jarııalanýy artyp keledi. Bul týraly QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Bilim jáne ǵylym vıtse-mınıstri Takır Balyqbaev málim etti.
Ǵylymǵa jastardyń tartylýy men ǵylymmen aınalysatyn adamdardyń sany da artyp kele jatqandyǵyna toqtalǵan ol, «sońǵy jyldary Qazaqstan ǵalymdarynyń nátıjeleri boıynsha álemniń belgili basylymdarynda ǵylymı maqalalarynyń jarııalanýy artyp keledi. Osy oraıda halyqaralyq reıtıngtik basylymdarda shyǵatyn qazaqstandyq ǵalymdardyń maqalalary 34 paıyzǵa ósip, ótken jyly 1874-ke jetti»,-dedi.
Bul turǵyda mınıstrliń orynbasary ǵylymdy basqarýdyń jańa júıesi tolyǵymen qalyptasqanyn, «Ǵylym týraly» Zań qabyldanǵannan keıin elimizde ǵylymdy basqarýda joǵary ǵylymı-tehnıkalyq komıssııa qurylǵanyn atap ótti.
Belgili bolǵandaı, sońǵy jyldary ǵylymǵa bólinetin qarjy kólemi 2,5 esege ósti. Eger 2010 jyly onyń deńgeıi 20 mlrd. teńge bolsa, 2013 jyly 52,9 mlrd. teńge, al ótken jyly 49 mlrd. teńgeni qurady.
