Halyqaralyq reıtıngter Qazaqstanǵa ne úshin qajet - sarapshy jaýaby
ASTANA. QazAqparat - «Ekonomıkalyq zertteýler ınstıtýty» AQ Strategııalyq ázirlemeler ortalyǵynyń dırektory Baqytgúl Qambar Qazaqstannyń halyqaralyq bıznesterge ne úshin qatysýy kerektigin aıtyp berdi, dep habarlaıdy QazAqparat tilshisi.
«Álem boıynsha eldiń damýyn kórsetetin negizgi barometrlerdiń biri - eldegi bıznestiń damý deńgeıi bolyp sanalady. Sondyqtan, Qazaqstan báıgege túsip otyrǵan úlken halyqaralyq reıtıngter elde qalyptasqan áleýmettik-ekonomıkalyq jaǵdaıdy kásipkerlerimizdiń pikiri arqyly anyqtaıdy. Jalpy, bizge básekege qabilettilikti baǵalaıtyn reıtıngter ne úshin kerek? Bul reıtıngter bizdiń eldiń basqa eldemen salystyrǵandaǵy damý deńgeıin kórsetedi. Qazaqstan 2030 jylǵa deıingi strategııasyn jarııalaǵan sátten bastap, álemdegi alpaýyt eldermen báıgege túskenin bilemiz. Bizdiń maqsat -áleýmettik jaǵdaıy, ómir súrý sapasy jaqsyraq elderdiń deńgeıine jetý, halyqtyń ómir súrý sapasyn jaqsartý. Sonymen birge, halyqaralyq reıtıngter - elge ınvestıtsııa tartýdyń quraly», - dedi Baqytgúl Qambar Astana ákimdiginde ótken «Básekege qabiletti bıznes - básekege qabiletti ekonomıka» kezdesýinde.
Onyń aıtýynsha, jahandyq básekege qabilettilikti baǵalaıtyn reıtıngke 130 el qatysady. Al Shveıtsarııanyń Lozanna qalasyndaǵy halyqaralyq damý ınstıtýty ótkizetin IMD reıtıngine - aldyńǵy qatarly damyǵan 60 el ǵana qatysa alady.
«2008 jyly Ekonomıkalyq zertteýler ınstıtýty Shveıtsarııadaǵy halyqaralyq menedjmentti damytý ınstıtýtynyń resmı seriktesi atandy. Sondyqtan, jyl saıyn resmı seriktes retinde biz Qazaqstannyń reıtıngke qatysýyna qoldaý kórsetemiz. Al Qazaqstan úshin bul reıtıngterdiń qajettiligi qandaı? Ózińiz de kez kelgen memlekette jumys isteý úshin aldymen sybaılas jemqorlyqtyń deńgeıine qaraısyz. Sybaılas jemqorlyq deńgeıin anyqtaý úshin halyqaralyq agenttikter ózge reıtıngterden málimet alady. Sondaı málimet alatyn reıtıngterdiń biri - IMD. Sondyqtan, bul reıtıngterge qatysý biz úshin mańyzdy, onsyz eldegi obektıvti jaǵdaıdy kóre almaımyz», - dep tolyqtyrdy Baqytgúl Qambar.
Qazirgi ýaqytta Qazaqstan atalǵan reıtıngte Úkimet qyzmetiniń tıimdiligi boıynsha 25 orynda, ekonomıkalyq qyzmet jónindegi faktorda - 40 orynda tur. Bul nátıjelerge qarap, memleket saıasatynyń, strategııasynyń baǵytyn anyqtaýǵa bolady.
«Jyl saıyn orta eseppen 700 kásiporyndy qamtıtyn derekqor toptastyryp, Lozanna ınstıtýtyna jiberemiz. Olar eshqandaı uıymdy araǵa salmaı, tikeleı kásiporyndarǵa suraqtar siltemesin jiberedi. Bul saýalnamaǵa 700 kásiporynnyń júzden astamy ǵana jaýap beredi. Árıne, kásipkerlerdiń ýaqyty tyǵyz ekenin túsinemiz. Aldaǵy ýaqytta kásiporyndardy baǵalaýǵa belsendi qatysýǵa shaqyramyn. Óıtkeni, sizderdiń bergen baǵalaryńyz arqyly eldegi ekonomıkalyq-áleýmettik jaǵdaıǵa baǵa beredi», - deıdi Baqytgúl Qambar.
