Halyqaralyq reıtıng eń qymbat brendke ıe qazaqstandyq bankti anyqtady

ASTANA. 9 sáýir. QazAqparat - «Brand Finance» Halyqaralyq konsaltıngilik kompanııasy «The Banker» jýrnalymen birlesip, dúnıejúzindegi 500 banktik kompanııa brendiniń qundylyq deńgeıine taldaý jasady.

2013 jylǵy reıtıngke qazaqstandyq eki bank qatystyryldy. Olardyń biri - «Qazaqstan Halyq Banki» AQ (brend Halyk Bank) 500 brendtiń ishinde 334-oryndy ıelenip, qazaqstandyq bankter arasynda quny jaǵynan eń qymbat brendti ıelendi. Halyk Bank brendiniń quny bıylǵy jyly 266 mln. AQSh dollaryna baǵalandy.

Aıta keteıik, atalǵan reıtıngke TMD elderi boıynsha tek reseılik jáne qazaqstandyq bankter ǵana qatysty. TMD elderiniń bankteri arasynda Qazaqstan Halyq banki besinshi oryndy ıelendi.

Reıtıngte kósh bastap turǵan bestikke - amerıkalyq Wells Fargo ($26,0 mlrd) jáne Chase ($23,4 mlrd) bankteri, brıtandyq HSBC bank ($22,8 mlrd) jáne AQSh-tyń Bank of America ($22,3 mlrd), Citi ($21,6 mlrd) bankteri endi.

Brand Finance sarapshylary banktik brendterdi marka ataýyna, bul brend úshinshi bir tulǵaǵa tıesili bolǵan jaǵdaıda, ony paıdalanǵany úshin ıesi jasaýǵa tıis bolatyn tólemderdiń negizinde baǵalady. Sonymen qatar konsaltıngtik kompanııa taldaýshylary baǵa berýdi qarjylyq eseptemege, Bloomberg málimetterine jáne óz zertteýlerine súıene otyryp júrgizdi.