Halyqaralyq reıtıng agenttikteri Qazaqstannyń JІÓ ósimine boljam jasady
«Kóptegen elderde belsendi vaktsınalaýdy júrgizý nátıjesinde epıdemıologııalyq ahýal jaqsarýda. Táýligine kovıdpen aýyrǵandardyń sany 2021 jylǵy qańtardyń ortasymen salystyrǵanda 46, al Qazaqstanda 59 paıyz tómendedi. OPEK+ elderiniń kelesi aıǵa munaı óndirisin shekteýdi saqtaý boıynsha qabyldaǵan sheshimi álemdik taýar naryqtary konıýnktýrasyna oń áserin tıgizdi. Búgingi tańda Brent munaı markasynyń baǵasy barreli 67 dollar», - dedi 2021 jyldyń qańtar-aqpanyndaǵy elimizdiń áleýmettik-ekonomıkalyq damý qorytyndysy jaıynda baıandaǵan mınıstr.
Sonymen qatar onyń aıtýynsha, metall baǵalarynyń qalpyna kelýi baıqalady. Jyldyń basynan beri metall baǵalarynyń ortasha ósimi 7 paıyz. Mystyń baǵasy 15,8, alıýmınııdiń baǵasy 9,4, myryshtyń baǵasy 1,7 paıyzǵa ósti.
«Jalpy, iskerlik belsendiliktiń jedel qalpyna kelýiniń basty sharty epıdemıologııalyq ahýaldyń jaqsarýy bolyp sanalady. Osy jylǵy aqpanda halyqaralyq reıtıng agenttikteri – Moody’s, Fitch Ratings jáne Standard and Poor’s Qazaqstannyń egemendik kredıttik reıtıngisin pandemııaǵa deıingi ınvestıtsııalyq deńgeıde rastady», - dedi ol.
Mınıstrdiń atap ótývinshe, pandemııa jaǵdaıynda Qazaqstannyń egemendik kredıttik reıtınginiń rastaýynyń basty faktorlary: ekonomıkanyń naqty sektorynyń ósý ornyqtylyǵynyń joǵary deńgeıi, ekonomıka men halyq tabysyn qalypqa keltirýshi ósýdiń joǵary áleýeti, daǵdarysqa qarsy sharalardy qalyptastyrý ıkemdiligi men tıimdiligi, sondaı-aq edáýir fıskaldyq rezervter.
«Osynyń aıasynda halyqaralyq reıtıng agenttikteri 2021 jylǵa Qazaqstannyń jalpy ishki óniminiń ósýin 3,2-3,8 paıyz deńgeıinde boljap otyr», - dedi Áset Erǵalıev.
