Halyqaralyq pándik olımpıadada júlde alǵan oqýshylarǵa qansha syıaqy berilmek

NUR-SULTAN. QazAqparat – Bıyl Qazaqstan oqýshylary halyqarlyq pándik olımpıadada 2 altyn, 13 kúmis jáne 11 qola medal jeńip aldy. Bul jaıynda QR Bilim jáne ǵylym mınıstri Ashat Aımaǵambetov málim etti, dep habarlaıdy QazAqparat tilshisi

«2021 jyl qazaqstandyq oqýshylar úshin oljaly boldy. Bıyl shákirtter álemdik olımpıadalarda 31 medaldiń 26-yn jeńip alyp, sońǵy jyldardaǵy rekordty jańartty. Bilim alýshylar el qorjynyna 2 altyn, 13 kúmis jáne 11 qola medal saldy. Bıylǵy Qazaqstan halqyna Joldaýynda Memleket basshysy Qasym-Jomart Kemeluly Toqaev daryndy balalardy qoldaý úshin sharalar ázirleýdi tapsyrdy.Bul mindetti iske asyrý úshin Mınıstrlik zańnamaǵa túzetýler ázirledi. Qazir zań jobasy QR Parlamenti Májilisiniń qaraýyna engizildi», - dep jazdy mınıstr Facebook paraqshasynda.

Onyń atap ótýinshe, túzetýler halyqaralyq pán olımpıadalarynyń júldegerlerine joǵary oqý oryndaryna UBT-siz, ıaǵnı konkýrstan tys negizde bilim alý úshin granttar berýdi, sondaı-aq osy olımpıadalardyń jeńimpazdary men júldegerleri jáne olardy daıarlaǵan pedagog- jattyqtyrýshylarǵa da birjolǵy aqshalaı syıaqy tóleýdi kózdeıdi.

«Oqýshylardy yntalandyrý úshin altyn medal ıegerlerine — 1500 AEK, kúmis medal – 1000 AEK, qola medal – 500 AEK kóleminde aqshalaı syıaqy taǵaıyndaý josparlanyp otyr», - dedi Ashat Aımaǵambetov.