Halyqaralyq opera jáne balet festıvali bıyl da óner súıer qaýymdy tosyn syılarymen tańǵaldyrmaq
ALMATY. 19 maýsym. QazAqparat - Álemdik deńgeıdegi opera jáne balet juldyzdarynyń bizdiń elimizge kelýi - kópten kútken, ári qyzyǵarlyqtaı úlken jaǵdaı bolyp otyr.
Ony Abaı atyndaǵy Qazaq memlekettik akademııalyq opera jáne balet teatrynyń dırektory Ǵabıt Nesipbaev búgin III Halyqaralyq opera jáne balet óneri festıvali qarsańynda ótkizgen baspasóz máslıhatynda aıtty.
Ǵabıt Nesipbaevtyń aıtýynsha, 20-25 maýsym kúnderi ótetin festıval baǵdarlamasyna teatr repertýaryndaǵy Djakoma Pýchchınıdiń «Bogema» men «Turandot hanshaıym» operalary enip otyr. Onda óner súıer qaýym sondaı-aq, Petr Chaıkovskııdiń «Aqqý kóli» jáne Borıs Eıfmannyń «Anna Karenına» baletterin tamashalamaq.
«Ústimizdegi jyl Almaty qalasynda mádenıet jyly bop belgilendi. Bul jaıt - klassıkalyq ónerdi ómiriniń mańyzdy bóligi sanaıtyn, rýhanı azyq alǵysy keletin kórermenderdiń nazarynan tys qalmaıdy. Sondyqtan ónersúıer qaýymnyń bul halyqaralyq festıvalge degen qyzyǵýshylyǵy joǵary bolady degen úmittemin. Jańa esimdermen tanysý, tanymal shyǵarmalardy olardyń oryndaýynda tyńdaý, rasynda da nazar aýdarýǵa turarlyq jaǵdaı», - deıdi Qazaqstan mýzyka qaıratkerleri odaǵynyń tóraǵasy, KSRO halyq artısi, Sotsıalıstik Eńbek Eri, professor Ermek Serkebaev.
«Halyqaralyq opera jáne balet óneriniń atalmysh festıvali jyl saıyn óz kórermenderin tosyn syılarmen tańǵaldyryp keledi. Ónersúıer qaýymnyń dástúrli merekeni asyǵa kútetininiń máni de osynda dep bilem. Ol qazaqstandyq jas oryndaýshylardyń shyǵarmashylyq turǵydan ósirip, opera jáne balet óneriniń qalyń qaýym arasynda nasıhattalýyna sep bolýy da atap ótýge turarlyq, mańyzdy jaıt», - dedi «Qazkommertsbank» AQ-nyń basqarma tóraıymy Nına Júsipova. Onyń aıtýynsha, otandyq jetekshi qarjy ınstıtýty Abaı atyndaǵy Qazaq memlekettik akademııalyq opera jáne balet teatrynyń aýqymdy shyǵarmashylyq jobasyna qoldaý kórsetýdi ózine mártebe sanaıdy. Bank teatrmen áriptese jumys istep kele jatqan 5 jyl kóleminde G. Donıtsettıdiń «Lıýchııa dı Lammermýr» men «Ǵashyqtyq sýsyny» operalyq qoıylymdary, «Jańa esimder» jas oryndaýshylardyń kontserti osy festıval barysynda júzege asyrylyp júr.
