Halyqaralyq óner forýmy aıasynda Rektorlar keńesiniń otyrysy ótedi
ASTANA. 26 aqpan. QazAqparat - Naýryzdyń 5-i men 16-sy aralyǵynda Astanada Halyqaralyq óner forýmy óz jumysyn bastaıdy. Astanadaǵy Qazaq ulttyq óner ýnıversıtetiniń qurylǵanyna 15 jyl tolýyna arnalǵan shara aıasynda Rektorlar keńesiniń otyrysy ótpek. Bul týraly búgin atalǵan mádenı sharaǵa baılanysty baspasóz máslıhatyn ótkizgen Qazaq ulttyq óner ýnıversıtetiniń rektory, professor, Qazaqstan Respýblıkasynyń halyq ártisi Aıman Musaqojaeva málim etti.
Onyń aıtýynsha, Halyqaralyq óner forýmy aıasyndaǵy mańyzdy máseleniń biri 6 naýryzda ótetin Rektorlar keńesiniń otyrysy bolmaq. Elordadaǵy Qazaq ulttyq óner ýnıversıtetiniń ǵımaratynda ótetin bul sharaǵa negizinen TMD qatysýshy-memleketteriniń Memleketaralyq gýmanıtarlyq yntymaqtastyq qory qoldaý jasap otyr. «Atap aıtqanda, Forýmǵa qatysýǵa Qazaqstan, Reseı (onyń ishinde Máskeý men Sankt-Peterbor, Qazan qalalarynyń), Ázirbaıjan, Grýzııa, Tájikstan, Qyrǵyzstan, Ýkraına, Armenııa, Belarýs, sondaı-aq Frantsııa, Italııa men Qytaı elderiniń joǵary mýzykalyq bilim oqý mekemeleriniń rektorlary shaqyrylǵan», - deıdi A. Musaqojaeva.
Eske sala ketsek, Forým aıasynda «Astana - álemniń segizinshi keremeti» atty mereıtoılyq kontsert 6 naýryzda «Qazaqstan» kontsert zalynda ótedi. Bul baǵdarlama keıinnen álemniń úzdik sahnalaryna jol tartady. Al týrneniń demeýshiligin «Samuryq-Qazyna» Qory atqaratyn bolady.
