Halyqaralyq olımpıadada jeńimpaz bolǵan oqýshylarǵa aqshalaı syıaqy beriledi - BǴM

NUR-SULTAN. QazAqparat – Halyqaralyq pándik olımpıadada jeńimpaz bolǵan oqýshylarǵa 500-1500 AEK kóleminde aqshalaı syıaqy beriledi. Bul týraly Bilim jáne ǵylym mınıstri Ashat Aımaǵambetov áleýmettik jelidegi paraqshasynda málim etti, dep habarlaıdy QazAqparat.

«Memleket basshysy Qasym-Jomart Toqaev daryndy balalardy qoldaýǵa erekshe kóńil bóletinin atap ótkim keledi. Jaqynda Prezıdent halyqaralyq pándik olımpıada jeńimpazdaryna birjolǵy aqshalaı tólemderdi tóleý normasyn qarastyratyn zańǵa qol qoıdy. Altyn medal alǵan oqýshyǵa 1 500 AEK, kúmis medalǵa 1 000 AEK, qola medalǵa 500 AEK kóleminde aqshalaı syıaqy beriledi», - dep jazady mınıstr.

Aıtýynsha, oqýshylardy jarysqa daıyndaǵan pedagogterge de birjolǵy syıaqy beriledi.

Sondaı-aq, halyqaralyq olımpıadalardyń jeńimpazdary men júldegerlerine qazaqstandyq JOO-ǵa túsý úshin avtomatty túrde granttar taǵaıyndalatynyn jetkizgen.

«Bilim jáne ǵylym mınıstrligi elimizde balalarǵa jaǵdaı jasaý jáne olımpıadalyq qozǵalysty damytý jumystaryn jalǵastyra beredi», - dep túıindegen Ashat Aımaǵambetov.

Eske salsaq, Qazaqstandyq oqýshylar alǵash ret qatysyp jatqan Dúnıejúzilik gımnazıadadan 72 medal aldy.