Halyqaralyq olımpıadada jeńgen balalarǵa qandaı qosymsha múmkindikter beriletini belgili boldy

NUR-SULTAN. QazAqparat – QR Bilim jáne ǵylym mınıstrliginiń Mektepke deıingi jáne orta bilim komıtetiniń tóraǵasy Gúlmıra Kárimova halyqaralyq olımpıadalardyń jeńimpazdaryna qandaı qosymsha múmkindikter jasalatynyn aıtty, dep habarlaıdy QazAqparat tilshisi.

«Mekteptegi bilim berýdiń sapasy men tıimdiligin sıpattaıtyn negizgi parametrlerdiń biri – daryndy balalardy anyqtaý, damytý jáne olardy respýblıkalyq, halyqaralyq olımpıadalar men ǵylymı jarystarǵa qatystyrý. 2020-2021 oqý jylynda qazaqstandyq 26 oqýshy jeti bedeldi halyqaralyq pán olımpıadalarynyń jeńimpazdary men júldegerleri atandy. 2021 jylǵy 1 qyrkúıektegi Qazaqstan halqyna Joldaýynda Prezıdent osyndaı daryndy balalardy, sondaı-aq olardyń ustazdaryn jan-jaqty qoldaý mindetin qoıdy. Halyqaralyq olımpıadalardyń jeńimpazdary men júldegerlerin, olardyń pedagogterin kótermeleý olardy halyqaralyq deńgeıde joǵary nátıjelerge qol jetkizýge yntalandyrý tetigi bolyp otyr. Bul jalpy alǵanda eldiń bilim salasy men adamı kapıtalynyń damýyna oń áser etedi. Sonymen qatar, mundaı yntalandyrý mehanızmi tıisti normatıvtik quqyqtyq aktilermen rettelýi jáne júıelenýi kerek, ıaǵnı yntalandyrý qarastyrylatyn naqty olımpıadalardyń tizimi bekitilýi tıis», - dedi G. Kárimova Ortalyq kommýnıkatsııalar qyzmetinde.

Osy oraıda Joldaýdy iske asyrý jónindegi Jalpy ulttyq is-sharalar josparyn oryndaý maqsatynda jeńimpazdar men júldegerlerdi joǵary jáne joǵary oqý ornynan keıingi bilim berý uıymdaryna konkýrstan tys qabyldaý, júldegerlerge jáne olardy daıyndaǵan pedagogterge birjolǵy aqshalaı syılyq berý josparlanyp otyr. Sondaı-aq, joǵary oqý oryndaryna konkýrstan tys qabyldaý úshin olımpıadanyń páni kadrlardy daıyndaý baǵytyna sáıkes kelgen jaǵdaıda, bilim grantaryn taǵaıyndaý júzege asyrylady. Jyl saıyn shamamen 50 jeńimpazǵa granttar bólinedi. Mysaly, 2021 jyly qazaqstandyq oqýshylar halyqaralyq olımpıadalardan 26 medal aldy (2020 jyly – 16).

Sonymen birge, sońǵy úsh jylda jeńimpaz atanǵan daryndy balalarǵa bilim berý grantyn taǵaıyndaý úshin olımpıadalar men jarystar tizbesine irikteý krıterııleri ázirlenýde.

«Sonymen qatar, halyqaralyq olımpıadalardyń altyn medal ıegerine – 1500 aılyq eseptik kórsetkish, kúmis medal – 1000 AEK, qola medal ıegerine 500 AEK mólsherinde birjolǵy syıaqy tóleý respýblıkalyq bıýdjet qarajaty esebinen josparlanýda. Sondaı-aq, olardy daıyndaǵan pedagogterge birjolǵy syıaqy tólemderi mynadaı mólsherde belgilenedi: altyn medal ıegerin daıyndaǵan pedagogke – 150 AEK, kúmis medal – 100 AEK, qola medal – 50 AEK», - dedi komıtet basshysy.