Halyqaralyq Olımpıada komıteti trıatlonnan medal sanyn kóbeıtýden bas tartty
NUR-SULTAN. QazAqparat - Halyqaralyq Olımpıada komıteti 2024 jylǵy Parıj Olımpıadasy jarys baǵdarlamasy men kvotalar sanyn bekitti. Osy oraıda, trıatlonnan medaldar sany esh ózgerissiz qaldy, dep habarlaıdy Olympic.kz.
Parıj Olımpıadasynda ádettegideı úsh medal jıyntyǵy sarapqa salynyp, trıatlonnan jalpy esebi 110 sportshy baq synaıdy.
«World Triathlon Halyqaralyq Olımpıada komıtetine ótinish jasap, trıatlonnan kvota sanyn arttyrýdy suraǵan bolatyn. HOK komıssııasy ótkizgen talqylaýdan soń, ázirge mundaı qadamnyń múmkin emestigi anyqtaldy. Sebebi, Parıjdegi Olımpıada oıyndarynda ózge sport túrlerinen qatysatyn atletter sany azaıtylyp jatyr. Dese de, 2024 jylǵy doda baǵdarlamasynda trıatlonnan aralas estafetanyń bary bizdi qýantady», - deıdi World Triathlon prezıdenti Marısol Kasado.
Eske sala keteıik, Halyqaralyq Olımpıada komıteti 2024 jylǵy Olımpıada oıyndarynyń baǵdarlamasyna ený úshin 40 ótinish kelip túskenin, biraq onyń birde-biri maquldanbaǵanyn habarlaǵan bolatyn.