Halyqaralyq Olımpıada komıteti AIBA-ny moıyndalý mártebesinen aıyrdy

NUR-SULTAN. QazAqparat - Lozannada Halyqaralyq Olımpıada komıtetiniń 134-sessııasy aıaqtalýǵa jaqyn. Shara barysynda HOK Halyqaralyq boks qaýymdastyǵyn (AIBA) moıyndalý mártebesinen aıyrýdy bekitti. Bul týraly Olympic.kz málim etti, dep habarlaıdy QazAqparat.

Atalmysh sheshimdi HOK músheleri uzaqqa sozylǵan jáne qyzý pikirtalastan keıin biraýyzdan qabyldady. Máselen, negizgi suraqtar 2020 jylǵy Olımpıada oıyndarynda bokstan kvalıfıkatsııalyq jarystar men týrnırlerdi uıymdastyrýdy qamtamasyz etýge mindettelgen maqsatty topqa baǵyttaldy. Eske salaıyq, oǵan Halyqaralyq gımnastıka federatsııasynyń basshysy Morınarı Vatanabe jetekshilik etedi. Oǵan Ýılıam Frederık Blık (Ýganda), HOK múshesi, Vıllı Kaltshmıtt Lýhan (Gvatemala), HOK Atqarý komıtetiniń múshesi, Mahmýd Medansı (Mysyr), HOK sportshylary komıssııasynyń múshesi, Marıýs Vızer (Rýmynııa), Halyqaralyq dzıýdo federatsııasynyń prezıdenti engen.

Buǵan deıin atalmysh top boks týrnıriniń jarys baǵdarlamasynyń jobasyn usynǵan bolatyn. Olımpıada-2020-da ol 13 salmaq sanatynda ótedi (erler arasynda - segiz jáne áıelder arasynda 5 salmaq boıynsha). Kvalıfıkatsııa kelesi jyldyń qańtarynda bastalady. AIBA óz quqyǵyn Tokıodaǵy Olımpıada oıyndary ótkennen keıin ǵana qalpyna keltire alady. Atap ótilgendeı, HOK músheleri AIBA-nyń uzaqmerzimdi «jarqyn keleshegine» kóleńke túsirgen.