Halyqaralyq medıtsınalyq qor Ońtústik Qazaqstanǵa donorlar izdeýde kómektespek
ASTANA. QazAqparat - Ońtústik Qazaqstan oblysynyń ákimi Janseıit Túımebaev «Severance - KZ» halyqaralyq medıtsınalyq qor prezıdentimen kezdesti, dep habarlaıdy QazAqparat aımaq basshysynyń baspasóz qyzmetine silteme jasap.
Kezdesý barysynda taraptar eki el arasyndaǵy saýda-ekonomıkalyq qarym-qatynasty damytý jóninde pikir almasty. Sondaı-aq densaýlyq saqtaý, bilim, ınnovatsııa salalaryn birigip damytý maqsatynda baılanysty nyǵaıtýǵa ýaǵdalasty. 
Óz kezeginde sóz alǵan qor jetekshisi An Larısa Qazaqstan jáne Ońtústik Koreıa respýblıkalary arasyndaǵy áriptestik qarym-qatynastyń jaqsy deńgeıde ekendigin atap ótip, Ońtústik Qazaqstan oblysynan halyqaralyq qordyń ókildigin ashýǵa nıetti ekendigin jetkizdi.
«Ońtústik Qazaqstan oblysynyń 3 mıllıonǵa jýyq turǵyny bar. Jambyl, Qyzylorda syndy kórshi oblystar da bizge jaqyn ornalasqan. Sondyqtan búgingi usynys-pikirlerińiz eskerýsiz qalmaıdy. Ásirese medıtsınalyq týrızmdi damytý jónindegi usynystaryńyzdy qoldaýǵa ázirmiz. Bul rette Ońtústik Koreıanyń úzdik zamanaýı tehnologııalaryn birlese meńgerý óte mańyzdy», - dedi Janseıit Qanseıituly.
Kezdesý barysynda oblystyq densaýlyq saqtaý basqarmasy men «Severance - KZ» halyqaralyq medıtsınalyq qory arasynda yntymaqtastyq jónindegi memorandýmǵa qol qoıyldy. Atalǵan kelisim negizinde qor azamattarymyzǵa medıtsınalyq kómek kórsetip, áleýmettik mekemelerge qolǵabys jasaıtyn bolady. Sonymen qatar, ota jasaýda, kadr daıarlaý, donor tabý máselelerinde óńirlik mekemelermen birlese jumys atqarmaq.
