Halyqaralyq matematıkalyq olımpıada - bútin ǵalamshar oqýshylary arasyndaǵy bedeldi, ári aýqymy keń ıntellektýaldyq saıys - J.Túımebaev
nbsp;ASTANA. Shildeniń 6-sy. QazAqparat /Gúlmıra Álıakparova/ - Halyqaralyq matematıkalyq olımpıada - bútin ǵalamshar oqýshylary arasyndaǵy bedeldi, ári aýqymy keń ıntellektýaldyq saıys.
Bul týraly búgin Astanada 51-shi Halyqaralyq matematıkalyq olımpıadanyń ashylý saltanatynda QR Bilim jáne ǵylym mınıstri Janseıit Túımebaev málim etti.
Mınıstrdiń atap kórsetkenindeı, Qazaqstanda mundaı deńgeıdegi olımpıadanyń ótkizilýi Dostastyq memleketter arasynda bolyp turǵan alǵashqy úrdis.
«Al olımpıadanyń Astanada ótkizilýi - bizdiń elimizdiń bilim salasyndaǵy deńgeıin kórsetip otyr. Elbasymyz qoǵamymyzdyń ıntellektýaldyq elıtasyn qalyptastyrýǵa, bilim berýdi damytýǵa árdaıym zor kóńil bólýde. Memleket basshysy N.Nazarbaevtyń tapsyrmasymen Qazaqstanda 1998 jyldan bastap daryndy jastarmen jumys isteıtin memlekettik júıe jumys istep keledi. Elimizde daryndy balalar men jastar úshin, olardyń múmkindikterin iske asyrýǵa qajetti jaǵdaılar jasalyp otyr», - dedi mınıstr.
Aıta keteıik, shildeniń 6-17-si aralyǵynda ótetin 51-shi Halyqaralyq matematıkalyq olımpıadaǵa álemniń 98 elinen barlyǵy 1 myńǵa jýyq delegat qatysýda.
Qazaqstan atalmysh olımpıadaǵa alǵash ret 1992 jyly baqylaýshy retinde qatysty. 1993 jyly qazaqstandyq oqýshylar oǵan birinshi ret qatystyrylyp, 1 kúmis pen 3 qola medaldy ıelenip qaıtty. 2006 jyly Slovenııada ótken 47-shi halyqaralyq olımpıadada Qazaqstan 2010 jylǵy olımpıadany óz jerinde ótkizý usynysymen shyqty. Bir jyldan keıin, ıaǵnı 2007 jyly elimizdiń jas matematıkteri úlken jetistikterge qol jetkizip, bul usynys qatysýshy elderi tarapynan oń qoldaý tapty.
