Halyqaralyq lańkestik álemdik turaqtylyqqa tikeleı qaýip tóndiredi
SSELЬ. 5 mamyr. QazAqparat /Dımash Syzdyqov/ - Halyqaralyq lańkestik burynǵysynsha búkil álem boıynsha qaýipsizdik pen turaqtylyqqa tikeleı qaýip tóndirip otyr.
NATO Bas hatshysy Anders Fog Rasmýssen Brıýsselde ótken brıfıngte osyndaı málimdeme jasady.
Onyń aıtýynsha, osydan 10 jyl buryn NATO Vashıngton kelisimshartynyń 5-babyn qoldanyp, buryn-sońdy bolmaǵan sheshim qabyldaǵan edi - 2001 jyldyń 11 qyrkúıegindegi lańkestik oqıǵalardy Soltústikatlantıkalyq alıansqa múshe barlyq elderge jasalǵan shabýyl retinde qabyldanǵan bolatyn.
«Aǵymdaǵy aptada Qurama Shtattar NATO boıynsha odaqtastary men jahandyq lańkestikpen kúreske qosylǵan basqa da halyqtardyń qaýipsizdikterin qamtamasyz etý isinde aıtýly jetistikke qol jetkizdi. Men Barak Obamany jáne 11 qyrkúıektegi jáne basqa da lańkestik áreketter kezinde qaza tapqan myńdaǵan beıkúná adamdardyń ólimine tikeleı jaýapty - «Ál-Kaıeda» jetekshisine qarsy júrgizilgen operatsııaǵa qatysýshylardy quttyqtadym», - dep atap kórsetti A.Rasmýssen óz sózinde.
A.Rasmýssenniń aıtýynsha, NATO-nyń lańkestikpen kúresýdi jalǵastyrýǵa degen talpynysy alıanstyń Aýǵanstandaǵy mıssııasynyń basyn biriktirip otyr. «Biz alǵan baǵytymyzdan qaıtpaımyz. Halyqaralyq lańkestik burynǵysynsha bizdiń halyqtarymyzdyń qaýipsizdigine jáne álem elderiniń turaqtylyǵyna tikeleı qaýip tóndirip otyr»,- dedi ol.
NATO-nyń Aýǵanstanǵa kelýine sebep bolǵan «№1 lańkestiń» kózi joıylǵanyna qaramastan, Alıanstyń Aýǵanstandaǵy strategııasy ózgermeıdi. «NATO elderi men onyń seriktesteri, Aýǵanstan budan bylaı eshqashan ekstremızmniń oshaǵyna aınalmaı, beıbit jaǵdaıda damýy úshin, eldegi mıssııasyn jalǵastyra bermek», - dep atap kórsetti A.Rasmýssen.
