Halyqaralyq Qyzyl Krest pen Qyzyl Aı uıymdarynyń federatsııasy Qazaqstandaǵy áriptesteriniń qyzmetimen tanysty
ASTANA. Qarashanyń 11-i. QazAqparat /Jasulan Amanbaıuly/ - Búgin Halyqaralyq Qyzyl Krest pen Qyzyl Aı uıymdarynyń federatsııasy Qazaqstandaǵy áriptesteriniń qyzmetimen tanysty,
dep habarlaıdy QazAqparat.
Halyqaralyq Qyzyl Krest qozǵalysy men Qyzyl Aı qoǵamy óziniń Qazaqstandaǵy jobalaryn Qazaqstannyń Ulttyq Qyzyl Aı qoǵamy arqyly júzege asyryp otyr.
Qazaqstannyń Ulttyq Qyzyl Aı qoǵamynyń prezıdenti Erkebek Arǵymbaevtyń atap kórsetkenindeı, ulttyq uıym óz qyzmetin 70 jyl buryn bastady. Uıym tabıǵı apat, tehnogendik náýbet kezinde japa shekken adamdarǵa materıaldyq-áleýmettik jáne gýmanıtarlyq kómek kórsetýge, adam ómiri men densaýlyǵyn saqtaýǵa baǵyttalǵan jobalardy úzbeı jalǵastyryp keledi. «Keleshegi zor uıymnyń 10 myńnan asa eriktileri bar, sondaı-aq olar shet aýdandarda turatyn kómekke zárý jandarǵa qolushyn sozýǵa árdaıym daıyn turady», deıdi ol.
Bıyl Qyzyl Krest qozǵalysynyń bastalýyna ıtermelegen Italııanyń Solferıno qalasyndaǵy shaıqasqa 150 jyl tolady. Sonymen qatar, Halyqaralyq federatsııanyń 90 jyldyǵy jáne atalmysh qozǵalysqa halyqaralyq mártebe ákelgen Jeneva konventsııasynyń 60 jyldyǵy.
Búgingi otyrys barysynda Qazaqstannyń Ulttyq Qyzyl Aı qoǵamynyń qyzmetin retteıtin zań tujyrymdamasy talqyǵa salyndy. Sondaı-aq Qyzyl Krest pen Qyzyl Aı emblemalaryn qorǵaý, uıymnyń qorǵanys, tótenshe jaǵdaılar mınıstrlikteri jáne basqa da organdarmen áriptestik ornatýy jaıy qaraldy.
