Halyqaralyq «KVN» odaǵynyń prezıdenti Maslıakov jumysynan ketti
ASTANA. QazAqparat - Halyqaralyq «KVN» odaǵynyń prezıdenti Aleksandr Maslıakov memlekettik qyzmet pen jeke bıznesti qatar júrgizdi dep aıyptalyp otyr, dep habarlaıdy QazAqparat Ura.ru aqparattyq agenttigine silteme jasap.
Habarlanǵandaı, Maslıakov «Planeta KVN» jastar ortalyǵy» memlekettik mekemege basshy bolyp kelgende «Aleksandr Maslıakov ı kompanııa (AMıK)» atty shyǵarmashylyq birlestiktiń quryltaıshysy bolyp qalǵan. Artynan jeke kásipker retinde tirkeldi. Al 2014 jyly «Planeta KVN» jastar ortalyǵy» memlekettik mekemesi men «Aleksandr Maslıakov ı kompanııa» birlestigi kelisimshart jasasyp, «Dom KVN» jaýapkershiligi shekteýli qoǵamyn qurǵan. Al aktsııanyń 51 paıyzy «AMıK»-ke berildi. Osy eldiń zańnamasy boıynsha memlekettik qyzmetti bıznespen qatar júrgizýge tyıym salynǵan. Maslıakov dál osy normany buzyp, qyzmet babyn óz múddesi úshin paıdalanǵan. Sebebi eki mekemeniń de basshysy boldy.
Atalmysh faktilerdi anyqtap, jýrnalıstik zertteý júrgizgen «Transperensı ınterneshnl» antıkorrýptsııalyq uıymynyń saıtyna sensek, Máskeý bıligi Aleksandr Maslıakovty «Planeta KVN» jastar ortalyǵy» memlekettik mekemesiniń basshysy qyzmetinen bosatty.
Aıta keteıik, buǵan deıin ınternette Kóńildiler men tapqyrlar klýbynyń belgili júrgizýshisi 76 jasynda ınsýltten kóz jumǵany týraly aqparat tarady. Keıin onyń jubaıy bul qaýesetterdi joqqa shyǵardy.
