Halyqaralyq qýyrshaq karnavalynda Astananyń teatry «Qańbaq shaldy» usyndy
ASTANA. QazAqparat - Elordanyń Qýyrshaq teatry Barselona men Parıjde ótken Halyqaralyq qýyrshaq karnavalynyń kezdesýine qatysty, dep habarlaıdy qala ákimdiginiń saıty.
Álemniń 54 memleketinen jınalǵan úzdik teatrlyq ujymdar ózara tájirıbe almasyp, ónerdiń osy túrin damytý perspektıvalaryn talqylady.
Shara barysynda Astana qalasynyń Qýyrshaq teatrynyń dırektory Toǵjan Hasanǵalıeva «Plenshetti qýyrshaqtar» taqyrybynda baıandama jasady. Bul sahna tóseminiń ústinen «júre» alatyn qýyrshaqtyń bir túri, ony planshetti dep ataıdy. Qazirgi kezde planshetti qýyrshaqtar óner áleminde keńinen tanymal jáne álemniń úzdik ártisterimen paıdalanylady. Elordalyq qýyrshaq oınatýshy ártister de olardy óz qoıylymdarynda keńinen qoldanylady jáne óz sheberlikterimen bólisedi.
Sonymen qatar, astanalyq ártister Halyqaralyq qýyrshaq karnavalynyń sheberlik synyptarynda qazaqtyń ulttyq stılinde jasalǵan ústel planshetti qýyrshaqtarymen óner kórsetti. Olar sheteldik áriptesteriniń nazaryna «Qańbaq shal» halyq ertegisin usyndy. Halyqaralyq qýyrshaq karnavalynyń kezdesýlerine qatysqan álemniń úzdik qýyrshaq oınatýshy ártisteri Astananyń Qýyrshaq teatry ártisteriniń shyǵarmashylyǵy men kásipqoılyǵyn joǵary baǵalady.
