Halyqaralyq kúntizbede jańa ataýly kún paıda boldy
ALMATY. QazAqparat - Halyqaralyq kúntizbede jańa ataýly kún paıda boldy. Ol - Halyqaralyq mı kúni. Bul kúndi atap ótýdi Halyqaralyq nevrologtar federatsııasy usynǵan. Ol endi alǵash ret ústimizdegi jyldyń 22 shildesinde atap ótilmek. Bul týraly QazAqparatqa Qazaqstannyń nevrologtar Lıgasy málimedi.
Sheteldik jáne otandyq mamandardyń aıtýynsha, mı - adamnyń eń mańyzdy jáne asa kúrdeli múshesi. Ol mıllıondaǵan «elektr jelilerinen» - aksondardan turady. Al olardyń jalpy uzyndyǵy jer sharyn tórt orap alýǵa jetedi. Adamnyń mıynda 8 mlrd. jýyq neırondar bar. Al olardyń arasyndaǵy 10 trln. jýyq baılamdar bizge qozǵalýǵa, qaraýǵa, oqýǵa, jazýǵa, oılaýǵa, sezinýge jáne basqa da áreketter jasaýǵa múmkindik beredi.
Ókinishke qaraı, mıdy zaqymdaıtyn aýrýlar álemde jyl sanap kóbeıip jatyr. Olar - ınsýlt, epılepsııa, mı isigi, jaraqattar, indetter, Altsgeımer derti, bas aýrý, toryǵý, uıqynyń buzylýy jáne t. b. Al alkogol, esirtki, temeki tartý, ekologııanyń nasharlyǵy, kúızelister men durys tamaqtanbaý mıdy zaqymdaıdy.
Nevrologtardyń pikirinshe, álemde árbir úshinshi adam óz ómirinde kez kelgen jasynda ınsýlt alýy múmkin. Mıdy zaqymdaıtyn aýrýlardy aldyn alý úshin árbir adam salamatty ómir saltyn ustanýy kerek. Sonymen qatar kitap oqý, sózjumbaqtardy sheshý, este saqtaý qabiletin damytý jáne bolashaqqa senimmen qaraý mıdyń jaqsy jumys isteýine septigin tıgizedi.
Qazaqstandyq nevrologtar Búkilálemdik mı kúnine qaraı arnaıy baǵdarlama ázirlep jatyr. Ol baǵdarlama boıynsha mamandardyń kezdesýi, baspasóz máslıhaty, QR Sýretshiler odaǵymen birlesip jasalǵan «Meniń mıym» atty taqyryptyq kórme jáne býkletter taratý boıynsha flesh-mob uıymdastyrylady.
Sondaı-aq bul kúni qalanyń eń úzdik nevrologtary tegin aqyl-keńester beredi. Atalmysh sharalar Almaty qalasynda 21-22 shilde aralyǵynda ótedi.
