Halyqaralyq kórmeler týraly konventsııa maquldandy - Májilis
ASTANA. QazAqparat - Búgin Parlament Májilisi «1928 jylǵy 22 qarashadaǵy Halyqaralyq kórmeler týraly konventsııany jáne oǵan qosymsha hattamalar men túzetýlerdi ratıfıkatsııalaý týraly» zań jobasyn maquldady. Konventsııa 1928 jyly Parıj qalasynda jasalǵan bolatyn.
Qujatta resmı túrde tanylǵan halyqaralyq kórmelerge anyqtamalar beriledi. Sonymen qatar, kórmeler jikteledi, onyń jiktelýine qaraı kórmelerdiń uzaqtyǵy, olardy ótkizý jıiligi, sonymen qatar, halyqaralyq kórmelerdi uıymdastyrý tártibi retteledi. Atalmysh konventsııaǵa ártúrli jyldary ózgerister men túzetýler engizilip otyrǵan. Al oǵan qatysýshy Taraptar 1972 jyldyń qarashasyndaǵy Hattamamen Konventsııanyń qazirgi zamanǵy jaǵdaılarǵa beıimdelgen jańa mátinin qabyldaǵan bolatyn. Konventsııanyń jańa mátinine sáıkes, halyqaralyq kórmeler ámbebap jáne mamandandyrylǵan dep bólinedi. Kórmelerdiń uzaqtyǵy alty aıdan aspaýy tıis. Soǵan oraı, Konventsııada kórmeni uıymdastyrýshyny aıqyndaý tártibi, tirkelgen kórmelerdi uıymdastyrýshylardyń jáne oǵan qatysýshy elderdiń mindettemeleri belgilenedi. Májilis Konventsııany oń baǵalap, qujatty maquldady.
