Halyqaralyq konferentsııada Qazaqstannyń jetistikteri jáne Kanadamen yntymaqtastyq talqylandy
QR Syrtqy ister mınıstrliginen málim etkendeı, konferentsııany ashqan Qazaqstannyń Kanadadaǵy Elshisi Aqylbek Kamaldınov elimizdiń ótken kezeńdegi negizgi jetistikteri men Prezıdent Qasym-Jomart Toqaevtyń bastamasymen elimizde júrgizilip jatqan jańa reformalar jóninde baıandap berdi.
Sondaı-aq, ol Kanada elimizdiń mańyzdy saýda-ekonomıkalyq seriktesi jáne Qazaqstanǵa tartylǵan sheteldik ınvestıtsııalardyń eleýli kózi bolyp tabylatynyn atap ótti.
Kanadanyń Qazaqstandaǵy Elshisi Nıkolıa Brýsso óz sózinde «Tuńǵysh Prezıdent Nursultan Nazarbaevtyń kóregendigi men is-áreketteriniń arqasynda Qazaqstan táýelsizdik jyldary ishinde Ortalyq Azııanyń eń qýatty jáne qarqyndy damyp kele jatqan elge aınalyp, óńirlik kóshbasshy jáne halyqaralyq bedeli joǵary memleket retinde qalyptasqanyn atap ótti.
Nursultan Nazarbaev qory janyndaǵy Álemdik ekonomıka jáne saıasat ınstıtýtynyń dırektory Erjan Saltybaev táýelsiz memleket retinde Qazaqstannyń ekonomıkalyq nyǵaıýynyń tarıhyna jáne eldiń syrtqy saıasatynyń biregeı modelin qalyptastyrýǵa egjeı-tegjeıli sholý jasady.
Konferentsııada Qazaqstanda 20 jyldan astam qyzmet etip kele jatqan jáne elimizdiń ekonomıkasyna júzdegen mıllıon AQSh dollaryn ınvestıtsııalaǵan kanadalyq kompanııalardyń basshylary da sóz sóıledi. Olardyń arasynda «Cameco» ýran kompanııasynyń Prezıdenti, «Qazaqstan-Kanada» Іskerlik keńesiniń teń tóraǵasy, Qazaqstannyń Saskachevan provıntsııasyndaǵy Qurmetti konsýly, QR Prezıdenti janyndaǵy Sheteldik ınvestorlar keńesiniń múshesi Tım Gıttsel, «Condor Petroleum» munaı-gaz kompanııasynyń Basqarýshy dırektory Norman Storm, «Ex-Im Trading» Bas dırektory Devıd Barker jáne «AGI-CDC Kazakhstan» kompanııasynyń basshysy Mark Fındlı. Konferentsııanyń moderatory «Al Hilal Bank Kazakhstan» Bas dırektory jáne Basqarma tóraǵasy Gordon Haskıns boldy.
Іs-shara Qazaqstannyń Kanadadaǵy Elshiliginiń bastamasymen Reseı men Eýrazııadaǵy kanadalyq iskerlik qaýymdastyǵymen (CERBA) birlese ótkizildi.
