Halyqaralyq kólik dáliziniń Kúıik asýyndaǵy bóligi asa qaýipti
ASTANA. QazAqparat - Jambyl oblysynda Batys Eýropa - Batys Qytaı avtomagıstraliniń Kúıik asýyndaǵy bóligi asa qaýipti. Qazir bul jolmen júk kólikteriniń qozǵalýyna shekteý qoıylǵan, dep habarlaıdy Habar 24.
Kólikter taqtaıdaı tegis jańa jol tursa da, tozyǵy jetken eski súrleýmen júrýge májbúr bolyp otyr. Júrgizýshilerdiń aıtýynsha, asýdan ótetin halyqaralyq avtodálizdiń osy tusy durys salynbaǵan. Áset Smaılov júk tasymaldaýmen uzaq jyldan beri aınalysady. Ásirese Shymkent-Taraz baǵytynda jıi júredi. Onyń aıtýynsha, Kúıik asýynyń eńistigin tym bıik etip salyp qoıǵan. Sonyń kesirinen eski jolmen saǵattap júrýge májbúr eken.
«O basta salǵan adamdar ne oılap saldy joldy? Aldymen qaýipsizdikti oılap baryp salmaı ma sol joldy. Qazir tehnıka jetedi.Al bizdiń júrisimiz mynaý. 10 mınýttyq jerdi bir saǵat júremiz. Qazir jaýyn joq. Qurǵaq bop onsha bilinbeı jatyr. Mynaý shuqyrlar tur. Keshe jaýyn bolǵan kezde mashınalar osy jerde tyǵylyp jattyq. Qashan mashına kelip súırep shyǵarady, qashan tros tabylady dedik. Mine joldyń jaǵdaıy», - deıdi kólik júrgizýshisi Áset Smaıylov.
Júrgizýshiler mıllıardtaǵan qarajatqa tóselgen joldyń qaýipsizdigi jobalaý kezinde durys eseptelmegen dep sanaıdy. Halyqaralyq talaptarǵa saı salynǵan jol tursa da, qazir júk kólikteri eski jolmen júredi. Jol dep aıtýǵa kelse, árıne. Bul eski asýmen qazir el ishindegi kólikter de, sheteldikter de qatynap jatyr.
Kólik júrgizýshisi Qaırat Beısenbaevtyń aıtýynsha, Batys Eýropa - Batys Qytaı avtodáliziniń 11 shaqyrymy Kúıik asýymen ótedi. Birinshi sanatty jol. 4 jolaqty. Barlyq qaýipsizdik sharalary qarastyrylyp tóselgen. Biraq 8 tonnadan aýyr salmaqty kólikterge bul jermen túsýge múldem tyıym salynǵan. Al kóterilýge tek kún jylyǵanda ǵana ruqsat etiledi.
«Arnaıy monıtorıng júrgizildi. Analız 547-557 shaqyrymy óte qaýipti ekendigin kórsetti. Munda 20-ǵa jýyq jol apaty tirkelip, 18 adam qaza taýyp, 68 adam zardap shekti. Kóp jaǵdaıda júk kólikteriniń tejegishteri isten shyǵady. Aldyn alý maqsatynda osyndaı belgiler qoıyldy», -deıdi oblystyq ákimshilik polıtsııa basqarmasynyń jol-tehnıkalyq ınspektsııasynyń bólim basshysy Nıkolaı So.
Al «Qazavtojol» ulttyq kompanııasy Jambyl oblystyq fılıaly dırektorynyń orynbasary Dáýren Tóltaevtyń aıtýynsha, qazirgi jaǵdaı jóndeýdi qajet etedi. «Sol sebepti biz qazirgi smeta jumystaryn eseptep osy aǵymdaǵy jyly tolyq eski kúıik avtojolyn 11 shaqyrym jolyn ortasha jóndeý jumystaryn tolyq ótkizýdi josparlanyp otyr»,- deıdi ol.
Batys Eýropa - Batys Qytaı avtodáliziniń 495 shaqyrymy Áýlıe ata óńirimen ótedi. Qazir bul jolmen qatynaıtyn kólik nópiri ýaqyt ótken saıyn artyp keledi. Búginde táýligine 7500 kólikke deıin jetken. Sondyqtan bul jerdiń ótkizý múmkindigin arttyrý úshin joldar jóndeýdi qajet etedi. Jaýapty mekeme ókiliniń aıtýynsha, qazir daıyndyq júrip jatqan kórinedi. Ortasha jóndeý jumystaryna 290 mıllıon teńge bólinip qoıypty.
