Halyqaralyq kólik dálizi arqyly Qytaıdan Eýropaǵa 50 mlrd. dollardyń ónimderi ótedi
«Kólik ınfraqurylymy salasynda negizgi joba - ol «Batys Eýropa - Batys Qytaı» kóliktik dálizi qurylysyna baılanysty bolyp otyr. Bul rette Qytaıdan Eýropaǵa qaraı eń qysqa avtojol baǵdary iske qosylady jáne ol barsha Eýrazııalyq qurlyqtyń kóliktik áleýetin arttyrýda úlken mańyzǵa ıe. Sarapshylardyń boljamynsha, 2020 jylǵa qaraı Eýropa men Qytaı arasyndaǵy jyl saıynǵy taýar aınalymnyń 8 paıyzǵa jýyǵy osy avtomobıl dálizi arqyly ótetin bolady. Eger aqshalaı esepteıtin bolsaq, bul shamamen 50 mlrd. dollarǵa jetedi»,-dedi T. Jaqsylyqov.
Jobany júzege asyrý nátıjesinde taýardy jetkizý ortasha alǵanda 10 táýlikti quraıdy. Salystyratyn bolsaq, teńiz joly 45 táýlikke jetedi. Qazaqstanda bıyl osy avtomagıstraldiń ýchaskesi tolyqtaı aıaqtalady.
Jobany júzege asyrýdyń sońynda atalǵan halyqaralyq dáliz boıynsha júk tasymaly 30 mln. tonnadan astam bolady dep kútilýde.
