Halyqaralyq koalıtsııa IM aqsha qoımasyn talqandady
ASTANA. QazAqparat - AQSh basqarǵan halyqaralyq koalıtsııa dúısenb kúni, 11 qańtarda Iraktyń Mosýl qalasynda «Islam memleketi» (IM) lańkestik uıymynyń aqsha qoımasyn talqandady. Bul týraly Lenta.ru Daily Sabah basylymyna silteme jasap habarlady.
«Bizdiń baǵalaýymyzsha, keltirilgen zalal mıllıondaǵan dollardy qurady. Bul qarajattar zańsyz jolmen: tonaýshylyq, alaıaqtyq esebinen, sondaı-aq munaı mámileleri arqyly alynǵan», - dep atap ótti AQSh qorǵanys vedomstvosynyń ókili. Basylym qoıma ornalasqan aýdanǵa árqaısysynyń salmaǵy 900 keliden eki bomba tastalǵanyn habarlady.
2015 jylǵy 7 jeltoqsanda amerıkandyq IHS zertteý ortalyǵynyń taldamashylary «Islam memleketi» lańkestik uıymynyń aı saıynǵy kirisin eseptedi. Olardyń málimetteri boıynsha, ol 80 mıllıon dollarǵa jetedi. Kompanııada atap ótilgendeı, kiristiń 50 paıyzdaıyn uıymnyń baqylaýyndaǵy aýmaqtardaǵy kommertsııalyq qyzmetterge salyqtar jáne jerler men menshikterdi tárkileý ákelgen, tabystyń taǵy 43 paıyzy munaı satýdan túsken.
Reseı qorǵanys mınıstrliginiń málimetteri boıynsha, IM-niń munaı satýdan kiristeri jylyna 2 mıllıard dollarǵa jýyqtaıdy. Esirtki aınalymyna baqylaý jónindegi federaldyq qyzmet dırektory Vıktor Ivanov top óziniń baqylaýyndaǵy aýmaqtar arqyly aýǵan geroıni tranzıtinen jylyna 500 mıllıon dollar tabys taýyp otyrǵanyn málimdedi.
5 jeltoqsanda The Washington Post Sırııa men Irakta jaýlap alǵan aýmaqtarynan aıyrylýy saldarynan «Islam memleketiniń» qarjylyq problemalaryn habarlady. Basylymnyń aqparaty boıynsha, top óz bıýjetiniń jetispestigin toptyń baqylaýyndaǵy aýmaqtarda turatyn Irak pen Sırııa azamattarynan jınalatyn salyqtardy kóbeıtý esebinen jabýǵa tyrysýda. AQSh Memlekettik departamenti jeltoqsannyń basynda toptyń munaı satýdan kirisi kúnine 1-1,5 mıllıon dollardy quraıtynyn atap ótti.
