Halyqaralyq kelisimsharttar Parlament qaraýyna ýaqytyly engizilýi kerek - I. Adyrbekov
ASTANA. QazAqparat - Ratıfıkatsııalaýǵa jatatyn halyqaralyq kelisimsharttar Parlament qaraýyna ýaqytyly engizilýi kerek. Búgin Syrtqy ister mınıstrliginde vedomstvo basshylarymen ótken kezdesý barysynda Senattyń Halyqaralyq qatynastar, qorǵanys jáne qaýipsizdik komıtetiniń tóraǵasy Ikram Adyrbekov osyndaı pikir bildirdi.
Komıtet tóraǵasy kezdesý barysyndaǵy áńgimede qol qoıylǵan jáne kúshine engen halyqaralyq qujattardyń ishki memlekettik úderisteriniń atqarylýyna nazar aýdardy. Onyń sózine qaraǵanda, «QR keıbir zańnamalyq aktilerine Qazaqstan Respýblıkasynyń halyqaralyq kelisimsharttary máseleleri boıynsha ózgerister men tolyqtyrýlar engizý týraly» zańyn júzege asyrý aıasynda Syrtqy ister mınıstrligi sapaly jumystar atqarýda. Degenmen, senator halyqaralyq kelisimsharttardy jasaý baǵytyndaǵy memlekettik organdardyń jospary naqty ári ózekti bolýy tıistigin atap ótti.
«Zańda memlekettik organdardyń ratıfıkatsııalaýǵa jatatyn jáne ýaqytsha qoldanylýy qarastyrylǵan kelisimsharttardy kúshine enetin merziminen alty aı buryn Parlamentke engizýi mindetti ekeni jazylǵan. Alaıda, Parlamentke bes-alty jyl buryn qol qoıylǵan jáne ratıfıkatsııalanýy tıis halyqaralyq kelisimsharttar da jıi túsip turady. Olardyń kúshine enýi úshin qajetti protsedýralar da tolyq oryndalmaı otyr. Máselen, bıyl biz «TMD memleketterimen ózara saýdada tehnıkalyq kedergilerdi joıý jónindegi Kedendik odaqqa múshe-memleketterdiń kelisimin ratıfıkatsııalaý týraly» zań jobasyn qaradyq. Al bul Kelisimdi Reseı men Belarýs 2013 jyly-aq ratıfıkatsııalap tastaǵan», - deıdi senator.
