Halyqaralyq Kazakhstan Open 2014 golf-týrnıriniń alǵashqy raýndynyń kóshbasshysy anyqtaldy
ALMATY. QazAqparat - Frantsııalyq golfshy Edrıan Bernadet Almatyda «Jaılaý» golf-shıpajaıynda ótip jatqan Kazakhstan Open Halyqaralyq golf-týrnıriniń alǵashqy raýndynyń kóshbasshysy atandy. Onyń kórsetkishi 65 (-7) - 65 soqqy. Bul, pardan 7 soqqy tómen.
Alǵashqy toǵyz shuńqyrdan keıin-aq, Bernadet bes «berdı» jasady. Tek 11-shi shuńqyrda ǵana bir ret qatelikke jol berdi (4 par). Qalǵan shuńqyrlardan ol minsiz ótti. Sóıtip, óz kartochkasyna taǵy úsh berdı jazdy. «Men barlyq alańqaılardan josparly túrde soqqy jasaı otyryp óttim. Týrnırdiń alǵashqy kúnin jaqsy nátıjemen bastaǵanyma óte qýanyshtymyn. Men buǵan deıingi týrnırlerde jaqsy oınadym. Bul jarysta da joǵary nátıjege qol jetkizýge tyrysamyn» - dedi óz sózinde Edrıan Bernadet. Aǵylshyndyq Ýılıam Harold kóshbasyna shyqqan Edrıen Bernadetten bir soqqy artta keledi. Ol úshinshi shuńqyrda (5 par) jasaǵan «albatrosynyń» arqasynda alǵashqy toǵyz shuńqyrdy mınýs jeti soqqyǵa úzdik ótti. Alaıda, alańnyń ekinshi jartysynda jasaǵan úsh boggıi oǵan birinshi oryndy saqtap qalýǵa múmkindik bermedi. Úshinshi orynǵa 67 (-5) nátıjemen shotlandııalyq Djordj Mıýrreı, Shveıtsarııalyq Damıan Ýlrıh jáne ıspandyq Alvaro Velasko jaıǵasty. Sonymen, týrnırdiń alǵashqy kúniniń nátıjesi tómendegideı boldy: 1 orynda Edrıan Bernadet, nátıjesi mınýs 7 (65) 2 orynda Ýılıam Harold, nátıjesi mınýs 6 (66) 3 orynda: Djordj Mıýrreı - mınýs 5 (67) Demıan Ýlrıh - mınýs 5 (67) Alvaro Velasko - mınýs 5 (67) Qazaqstandyq golfshylar tómendegideı nátıjeler kórsetti: Aleksandr Vongaı, nátıjesi plıýs 13 (85); Nurtaı Saldarov, nátıjesi plıýs 18 (90); Nurlan Maqulbekov, nátıjesi plıýs 22 (94); Aıta ketelik, bul jerde: «Hole-in-one» - (3 par) shuńqyrǵa dopty bir soqqymen túsirý, ıaǵnı 2 soqqy únemdeldi degen sóz. «Albatros» - golfshynyń dopty 5 parlyq shuńqyrǵa ekinshi soqqymen salýy, ıaǵnı úsh soqqyny únemdep qaldy degen sóz. Bul golfta óte sırek kezdesedi! Sondyqtan óte joǵary baǵalanady! «Igl» - 4 jáne 5 parlyq shuńqyrda kórsetilgen nátıjeler, ıaǵnı golfshy 5 parlyq shuńqyrdy 3 soqqymen (- 2 soqqy únemdeldi), al 4 parlyq shuńqyrdy 2 soqqymen ótedi (- 2 soqqy únemdeldi). «Berdı» - golfshy shuńqyrlardy pardan 1 soqqy kem jasap ótti. «Par» - golfshy shuńqyrdyń resmı kórsetilgen paryna sáıkes soqqy jasady. «Boggı» - golfshy shuńqyrdyń parynan bir soqqy artyq jasady. «Dablboggı» - golfshy shuńqyrdyń parynan 2 soqqy artyq jasady.
