Halyqaralyq qazaq kúresi federatsııasynyń basshysy saılandy
ASTANA. QazAqparat - QR Energetıka mınıstri Qanat Bozymbaev Halyqaralyq qazaq kúresi federatsııasynyń (HQKF) prezıdenti bolyp saılandy, dep habarlaıdy QazAqparat.
Atap aıtqanda, búgin Astanada Halyqaralyq qazaq kúresi federatsııasynyń quryltaı kongresi ótip, oǵan álemniń 35 elinen ókilder qatysty. Kongress kezinde federatsııanyń jarǵysy bekitilip, oǵan qosa jańa uıymnyń qazaq kúresin aldaǵy tórt jylda damytý jumystarynyń jospary qabyldandy.
Shara barysynda qatysýshylardyń barlyǵy Halyqaralyq qazaq kúresi federatsııasynyń prezıdentigine Qanat Aldabergenulynyń kandıdatýrasyn qoldady. Aıta keteıik, ol sonymen qatar QR Qazaq kúresi federatsııasynyń qurmetti prezıdenti qyzmetin de atqarýda.
Jıyn barysynda HQKF prezıdentiniń orynbasarlary da saılandy. Jarǵyǵa sáıkes, 5 vıtse-prezıdent laýazymy qarastyrylǵan. Osy oraıda federatsııanyń birinshi vıtse-prezıdenttigine grek-rım kúresinen qazaqtan shyqqan tuńǵysh Olımpıada chempıony, álem chempıony, álem kýboginiń ıegeri, dańqty balýan Jaqsylyq Úshkempirov bekitildi.
Munymen qosa, vıtse-prezıdentter bolyp dańqty balýan Dáýlet Turlyhanov, Qytaıdaǵy qazaq kúresi federatsııasynyń prezıdenti Aıdarhan Qabdollauly, «Qazaqstan Barysy» qazaq kúresin damytý qorynyń tóraǵasy Arman Shoraev, sondaı-aq Eýropa atynan Ýnkas Galek (Polsha) saılandy.
Sharaǵa qatysqan 35 eldiń ókilderi Halyqaralyq qazaq kúresi federatsııasynyń logotıpin de biraýyzdan bekitti.
