Halyqaralyq Qaıta qurý jáne Damý banki Qazaqstanǵa energııa tıimdiligin arttyrý boıynsha 21,7 mln. dollar grant bóledi
ASTANA. QazAqparat - Búgin Parlament Májilisiniń jalpy otyrysynda «Qazaqstan Respýblıkasy men Halyqaralyq Qaıta qurý jáne Damý Banki arasyndaǵy «Qazaqstanda energııa tıimdiligin arttyrý» jobasy boıynsha grant týraly kelisimdi ratıfıkatsııalaý týraly» zań jobasy maquldandy.
«Halyqaralyq Qaıta qurý jáne Damý bankiniń usynatyn energııa tıimdiligin arttyrý baǵytyndaǵy granty elimizdiń strategııalyq mindetterine sáıkes keledi. Jobanyń aıaqtalý merzimi 2017 jyldyń 30 maýsymyna belgilenip otyr. Grant somasy 21,7 mln. AQSh dollaryn quraıdy. Al jobanyń maqsaty memlekettik jáne áleýmettik nysandardaǵy energııa tıimdiligin jaqsartýǵa, energııatıimdilik baǵytynda qarjylandyrý júıesin qurýǵa baǵyttalǵan», - dedi zań jobasy boıynsha baıandaǵan Investıtsııalar jáne damý vıtse-mınıstri Albert Raý.
Onyń aıtýynsha, joba ınvestıtsııalyq jáne tehnıkalyq kómek kórsetý sekildi eki quramdastan turady. Onyń birinshisi boıynsha memlekettik jáne áleýmettik nysandardyń energııa tıimdiligi baǵytyndaǵy ınvestıtsııalyq tartymdylyǵyn 17,7 mln. dollarǵa deıin arttyrý kózdeledi. «Bunyń aıasynda áleýmettik salanyń 70-ke tarta nysanyn qarjylandyrý qarastyrylyp otyr, sonyń ishinde aǵymdaǵy jylǵa 7 oblystan 19 nysan tańdap alyndy. Ekinshiden, tehnıkalyq kórek kórsetý baǵytynda ınstıtýtsıonaldyq, naryqtyq tetikterdi damytý, ornyqty energetıkany qalyptastyrý máseleleri qamtylady. Bundaǵy basty qadamnyń biri memlekettik reestrdi avtomattandyrý jaıynda bolyp otyr», - dedi A.Raý.
Onyń sózine qaraǵanda, osy baǵytta aqparattyq-túsindirý jumystary júzege asady, ornyqty energetıkany qarjylandyrý tetikteri de qamtylady. «Nátıjesinde memlekettik áleýmettik nysandarǵa aldyńǵy qatarly tehnologııalar engiziledi, energııa tıimdiligi arqasynda qarajattar únemdeledi», - dedi vıtse-mınıstr.
