Halyqaralyq Qaıta Qurý jáne Damý banki Qazaqstanǵa 102,9 mln. dollar somasynda qaryz beredi
Kelisimge sáıkes, Irrıgratsııalyq jáne drenajdyq júıelerdi jetildirý jónindegi jobany júzege asyrý kózdelip otyr. Aýyl sharýashylyǵy mınıstri Asyljan Mamytbekovtiń aıtýynsha, jobany iske asyrýǵa baǵyttalatyn qarajattyń jalpy kólemi 339,5 mln. dollardy quraıdy. Sonyń ishinde jobany qarjylandyrý úshin Halyqaralyq Qaıta Qurý jáne Damý banki Qazaqstanǵa 102,9 mln. dollar somasynda qaryz beredi. Al respýblıkalyq bıýdjetten qosa qarjylandyrý 236,6 mln. dollardy quramaq. Qaryzdy óteý merzimi 2022 jyldan bastap on jyldy quraıdy. Bul rette mınıstr Asyljan Mamytbekov jobanyń ekinshi kezeńinde sheteldik tájirıbe men ınnovatsııa jetistikterin paıdalana otyryp, sýarmaly jerlerdiń sýmen qamtamasyz etilýin jaqsartý boıynsha qoldaǵy drenajdyq júıelerdi jetildirý kózdeletinin atap ótti.
«Qurǵaqshylyǵy basym transshekaralyq ózenderdiń, atap aıtqanda Syrdarııa, Shý, Talas, Іle basseınderindegi aýyl turǵyndarynyń áleýmettik, ekonomıkalyq jáne ekologııalyq jaǵdaılaryn jaqsartýǵa baǵyttalady. joba 113 myń gektar aýmaqty qamtıdy. Munyń ishinde Almaty oblysynda - 12,5 gektar, Jambyl oblysynda - 15 myń gektar, Ońtústik Qazaqstan oblysynda - 70,4 myń gektar, Qyzylorda oblysynda - 15,5 myń gektar jer aýmaqtary qamtylady», - dedi Aýyl sharýashylyǵy mınıstri Asyljan Mamytbekov.
Onyń sózine qaraǵanda, joba 2021 jyly aıaqtalatyn bolady.
Parlament qabyldaǵan Zań Memleket basshysynyń qol qoıýyna joldanady.