Halyqaralyq qarjy uıymdarynan avtokólik joldaryn jańǵyrtýǵa 1 trln. teńge shamasynda zaem tartylady

ASTANA. QazAqparat - 2015-2019 jyldar aralyǵynda avtokólik joldaryn damytý jobalaryna 1 trln. teńge shamasynda zaem tartylmaq. Búgin Ortalyq kommýnıkatsııalar qyzmetinde ótken brıfıngte Investıtsııalar jáne damý mınıstrligi Avtokólik joldary komıteti tóraǵasynyń orynbasary Amangeldi Bekov málim etti.

Aıta keterligi, Elbasy bekitken Infraqurylymdy damytýdyń «Nurly jol» baǵdarlamasyna sáıkes, aldaǵy bes jylda avtkólik joldary salasynda 11 joba júzege asyrylyp, 7 myń shaqyrymnan astam joldar jańǵyrtylmaq. Buǵan Ulttyq qor qarajatynan bólek (2015-2016 jyldarǵa - 301 mlrd teńge), halyqaralyq qarjy qurylymdarynan zaemdar da tartylatyn bolady.

«Bul shamamen 1 trln. teńge nemese 5,5 mlrd dollar shamasynda bolady. Búgingi kúni mınıstrlik osy baǵytta aldyn ala kelissózder júrgizip jatyr, jyl sońyna deıin qaryz týraly 12 kelisimge qol qoıýdy josparlap otyrmyz», - deıdi A.Bekov.

Onyń sózine qaraǵanda, halyqaralyq qarjy uıymdary esebinen «Ortalyq-Ońtústik» jobasy boıynsha qaryzǵa alynǵan qarajatqa Qaraǵandy-Kýratov jol ýchaskeleri jańǵyrtylady. Al buǵan qarajat Dúnıejúzilik bank pen Eýropalyq Qaıta Qurý jáne Damý bankinen tartylmaq.

«Sosyn «Ortalyq-Batys» jobasyna Dúnıejúzilik banktiń, Islam banki, Azııa Damý bankiniń shamamen 1,5 mlrd dollar kólemindegi qarajattaryn tartý qarastyrylady. Bunyń ishinde «Aqtóbe-Atyraý-Astrahan» jobasy boıynsha 960 mln dollardy Azııa damý banki men Islam daný bankinen alýdy josparlaımyz. «Jetibaı-Jańaózen» jobasyn júzege asyrý úshin 140 mln dollar kóleminde Azııa damý bankinen, «Uzynaǵash-Otar» jobasyna Dúnıejúzilik bankten 213 mln dollar kóleminde qaryz tartylady. Bıyl bul jobalar boıynsha tehnıkalyq negizdemeler ázirlense, qurylys jumystaryn kelesi jyldyń ekinshi toqsanynda bastaý kózdelip otyr»,- dedi komıtet ókili.