Halyqaralyq qarjy korporatsııasy qazaqstandyq keńsesiniń ornyqty jumysyna arnalǵan qujat maquldandy

NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasy men Halyqaralyq qarjy korporatsııasy arasyndaǵy Qazaqstan Respýblıkasynda ofıster qurý jáne olardyń qyzmeti týraly kelisimdi ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

Kelisim 2020 jyly 28 qańtarda Nur-Sultan qalasynda jasaldy.

«Kelisim Halyqaralyq qarjy korporatsııasynyń ofısi qyzmetiniń negizgi erejelerin, sondaı-aq, qyzmetkerler úshin artyqshylyqtar men ımmýnıtetterdi belgileıdi. Halyqaralyq qarjy korporatsııasy 1956 jyly qurylyp, halyqaralyq damý ınstıtýty bolyp tabylady. Onyń negizgi qyzmeti jeke sektordyń damýyna járdemdesýge baǵyttalǵan.

Halyqaralyq Qarjy Korporatsııasy Dúnıejúzilik bank tobynyń quramyna kiredi», - dedi QR Ulttyq ekonomıka mınıstri Rýslan Dálenov.

Dúnıejúzilik bank toby mynadaı bes uıymnan turady:

Halyqaralyq qaıta qurý jáne damý banki;

Halyqaralyq qarjy korporatsııasy;

Halyqaralyq damý qaýymdastyǵy;

Investıtsııalar kepildikteri jónindegi kópjaqty agenttik;

Investıtsııalyq daýlardy retteý jónindegi halyqaralyq ortalyq.

Sonymen birge, korporatsııa óńirlik ofısteri álemniń tek 13 qalasynda, onyń ishinde Almatyda ornalasqan.

«Halyqaralyq qarjy korporatsııasy ofısteri ornalasqan barlyq memlekettermen ofısterdiń qyzmeti týraly uqsas kelisimder jasady.

Halyqaralyq qarjy korporatsııasy Qazaqstanda óz qyzmetin 1994 jyldan bastap júzege asyrady. Osy kezeńnen bastap 1,6 mıllıard dollar kóleminde jobalar qarjylandyryldy. Bul Ortalyq Azııa elderine salynǵan ınvestıtsııalardyń jalpy kóleminiń 70 protsentin quraıdy. Atalǵan kelisim Halyqaralyq qarjy korporatsııasynyń qazaqstandyq ofısiniń ornyqty jumys isteýine jáne jańa ınvestıtsııalar tartýǵa yqpal etedi. Kelisimdi ratıfıkatsııalaý teris áleýmettik-ekonomıkalyq jáne quqyqtyq saldarlarǵa ákep soqtyrmaıdy», - dep túsindirdi mınıstr.