Halyqaralyq izdeýde júrgen reseılik Aqtóbeden tabyldy

AQTÓBE. QazAqparat – Aqtóbe polıtsııasy sheteldikterdi tekserip jatyr. Tekserý kezinde reseıliktiń halyqaralyq izdeýde júrgeni anyqtaldy, dep habarlaıdy QazAqparat tilshisi.

Aqtóbede polıtsııa qyzmetkerleri 1-14 qazan aralyǵynda shetel azamattaryn tekserip jatyr. Alǵashqy kúnderi Ózbekstan Respýblıkasynyń 25 azamaty jáne Reseı Federatsııasynyń 2 azamaty bólimshege jetkizildi. Olardyń 21-i kóshi-qon zańnamasyn buzǵany úshin ákimshilik jaýapqa tartyldy.

«Polıtsııa qyzmetkerleri halyqaralyq izdeýde júrgen Reseı Federatsııasynyń eki azamatyn ustady. Aqtóbe qalasynda turatyn 29 jastaǵy reseılik Qylmystyq kodeksiniń 158-babynyń 2-bóligi («Urlyq» baby) boıynsha izdeýde bolǵan. Sondaı-aq, Daǵystan Respýblıkasy Mahachkala qalasynyń polıtsııa qyzmetkerleri izdep júrgen 35 jastaǵy turǵyn tabyldy. Ol da Aqtóbe qalasynda turady», - dep habarlady oblystyq PD baspasóz qyzmeti.

Sonymen birge polıtsııa áleýmettik jelilerge monıtorıng júrgizip jatyr. Tyıym salynǵan dinı materıaldardy messendjerlerge saqtaǵandar da anyqtaldy.

«Aqtóbe qalasynyń 35 jastaǵy turǵyny óziniń Instagram áleýmettik jelisindegi jeke paraqshasynda destrýktıvti baǵyttaǵy dinı sıpattaǵy aýdıo jáne beıne materıaldardy jarııalady. Er adam QR ÁQBtK-niń 453-baby 1-bóligi (Buqaralyq aqparat quraldarynyń ónimin, sol sııaqty ózge de ónimdi Qazaqstan Respýblıkasynyń aýmaǵynda daıyndaý, saqtaý, ákelý, tasymaldaý, taratý) boıynsha ákimshilik jaýapqa tartylyp, 20 AEK mólsherinde ákimshilik aıyppul salyndy», — dep habarlady oblystyq PD baspasóz qyzmeti.