Halyqaralyq izdeýde júrgen ishki ister salasynyń Esirtki bıznesimen kúres komıtetiniń burynǵy tóraǵasy Ankarada ustaldy
ASTANA. Qańtardyń 20-sy. QazAqparat /Aıdar Ospanalıev/ - Qyzmet babyn teris maqsattarǵa paıdalandy degen aıyppen izdeý salynǵan Іshki ister mınıstrliginiń Esirtki bıznesimen kúres komıtetiniń burynǵy tóraǵasy Asqar Isaǵalıev Túrkııa astanasynda ustaldy.
Bul týraly búgin jýrnalıstermen bolǵan aptalyq brıfıngte Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov málim etti, dep habarlaıdy QazAqparat.
Onyń málimetterine qaraǵanda, atalmysh azamatqa qatysty jınalǵan derekter men onyń sot organdaryna tıisti málimetterdi bermegeni úshin sot qyzmetkerleri A.Isaǵalıevti tutqynǵa alý qajet degen sheshim shyǵaryp, oǵan halyqaralyq izdeý jarııalanǵan. Al ótken jyldyń qazan aıynda Qazaqstan Interpolynyń ulttyq ortalyq bıýrosy ony tutqynǵa alyp elimizge ekstradıtsııalaý maqsatynda tıisti sharalar júrgizip, qashqyndy ustaý jóninde Interpolǵa múshe elderdiń barlyǵyna tıisti málimetter jibergen. «Arnaıy júrgizilgen izdestirý sharalarynyń barysynda onyń Reseı, Ózbekstan, Qytaı, Gonkong, Izraıl jáne Italııa sııaqty memleketterde bolǵany jóninde málimetter kelip túsken. Sondaı-aq ishki ister organynyń ókilderine A.Isaǵalıevtiń Túrkııada jasyrynyp júrýi múmkin degen de aqparat kelgen. Osyǵan qaraı Qazaqstan men Túrkııanyń Interpol ókilderi ony Túrkııa aımaǵynan 4 aı boıy izdestirdi. Al qańtardyń 9-y kúni izdeýde júrgen azamattyń Ankara qalasynda ustalǵandyǵy jóninde aqparat kelip tústi. Qazirgi tańda Túrkııa tarapy ony elimizge ekstradıtsııalaý máselesimen aınalysýda», dedi Q.Jumanov.
