Halyqaralyq izdeýde bolǵan Iordanııa azamaty Astanada ustaldy
ASTANA. QazAqparat - Astana qalalyq Іshki ister departamenti 51 jastaǵy ıordanııalyq azamatty qolǵa túsirdi, dep habarlaıdy vedomstvonyń baspasóz qyzmeti.
«Astana qalalyq ІІD qyzmetkerleri Iordanııanyń Ulttyq ortalyq Interpol bıýrosy arnalary arqyly Iordanııa Koroldigi Qylmystyq kodeksiniń 265-baby boıynsha (qujatty qoldan jasaý) halyqaralyq izdeýde júrgen 51 jastaǵy Iordanııa Koroldiginiń azamatyn anyqtap, ony qolǵa túsirdi», - delinedi habarlamada.
Polıtsııa habarlaǵanyndaı, ustalǵan azamat Astana qalalyq ІІD-niń ýaqytsha ustaý ızolıatoryna qamaldy. Qazirgi ýaqytta Iordanııa polıtsııasyna berý maqsatynda ony elden ekstradıtsııalyq qamaýǵa alý týraly másele sheshilýde.
