Halyqaralyq ІT ýnıversıtetiniń burynǵy rektory men esepshisi sottaldy
ALMATY. QazAqparat - Halyqaralyq aqparattyq tehnologııalar ýnıversıtetiniń burynǵy rektory Damır Shynybekov sottaldy, dep habarlaıdy QazAqparat tilshisi.
№2 Bostandyq aýdandyq soty ýnıversıtettiń burynǵy rektory Damır Shynybekov pen burynǵy esepshi Janaıym Spabekovany bas bostandyǵynan aıyrý týraly úkim shyǵardy. Sýdıa sottalýshylardyń árqaısysyn 8 jylǵa bas bostandyǵynan aıyrdy. Sonymen qatar, ekeýiniń de múlki tárkilenetin boldy.
Memlekettik aıyptaýshy rektor men burynǵy esepshisi Janaıym Spabekovany 8 jylǵa bas bostandyǵynan aıyrýdy suraǵan bolatyn.
Aıta keteıik, oqý ornynyń burynǵy rektory Damır Shynybekov byltyr maýsym aıynda qamalǵan bolatyn. Sottalýshy D. Shynybekov pen J.Spabekovaǵa Qylmystyq kodekstiń 189-baby 2-bólimi 4- tarmaǵymen 1,7 mlrd teńge jymqyrdy degen aıyp taǵyldy.
Bas esepshi Janaıym Spabekova 2013-2018 jyldar aralyǵynda 414 mln 790 myń teńgeni jymqyrǵanyn moıyndady. 2017 jyly 128,2 mln teńge alǵan. Onyń aıtýynsha, bul aqshaǵa Nur-Sultan qalasynyń Esil aýdanynan bir páter satyp alǵan. Almatyda «Araı» turǵyn úıinen parkıngi bar 3 páter jáne Nissan Qashqai, Toyota Hilux kólikterin satyp alǵan. Qostanaı oblysynda «Aıgúl balabaqshasy» JShS, «Torǵaı kópsalaly kolledji», «Torǵaı jylyjaıy» jáne «Aralbaı qaǵazy» kompanııalaryn satyp alǵan. Qostanaı oblysy Torǵaı aýylynda 3 úı, 1 jer ýchaskesin alǵan. Kompanııalar men jyljymaıtyn múlikter baýyry men balasynyń atyna jazylǵan. Biraq ekeýi de bul dúnıe-múlik qandaı aqshaǵa kelgenin aıta almady.
Ýnıversıtet basshylyǵyna Damır Shynybekov 2009 jyly kelgen. 2017 jyly ol Almaty qalalyq máslıhat depýtaty bolyp taǵaıyndaldy.
