Halyqaralyq ınspektorlar Aqtaý portynda kemelerdi tekserdi
AQTAÝ. QazAqparat - Aqtaýda portty memlekettik baqylaý jónindegi oqý jobasy iske asyryldy. Ol Qazaqstan tarapy shaqyrtqan Teńiz qaýipsizdigi jónindegi Eýropalyq agenttikpen birlese uıymdastyryldy. Otandyq mamandar jyl saıyn Halyqaralyq teńiz ákimshiliginiń talaptaryna sáıkes oqýdan ótedi, dep habarlaıdy QR Investıtsııalar jáne damý mınıstrliginiń baspasóz qyzmeti.
Joba aıasynda halyqaralyq ınspektorlar qazaqstandyq porttarǵa kiretin sheteldik kemelerdi tekserý boıynsha teorııalyq jáne tájirıbelik sabaqtar ótkizdi. Іs-shara barysynda porttyq baqylaý tekserisin júrgizý protsedýralary boıynsha jańadan qabyldanǵan IMO qararyna sáıkes ınspektsııalyq qyzmettiń quqyqtyq aspektileri; mashına bólimine, keme júıelerine jáne jabdyqtarǵa qoıylatyn halyqaralyq IMO konventsııasynyń talaptary boıynsha máseleler qaraldy.
Budan bólek, halyqaralyq ınspektorlar Aqtaý portynda kemelerdi, kemeniń portqa keler aldynda qujattaryn tekserý úshin ınspektorlar qoldanatyn RuleCheck biriktirilgen eýropalyq júıeniń jumysyn kórdi.
Semınar barysynda birqatar qazaqstandyq kemeler men Irannyń 2 kemesi tekserildi.
Iran kemesiniń bireýinde keme qaýipsizdigin qamtamasyz etýge qatysty zańbuzýshylyqtar anyqtaldy. Atap aıtqanda, kemedegi qural-jabdyqtarda aqaý bary jáne halyqaralyq konventsııalarǵa sáıkes tehnıkalyq eksplýatatsııa talaptary men normalary saqtalmaǵany belgili boldy.
Kemege qatysty eskertpelerdiń basym bóligi sol jerde túzetildi.
