Halyqaralyq ǵylymı jobalarǵa qatysatyn jas ǵalymdardy qoldaý tetigin ázirleý qajet – vıtse-premer

ASTANA. QazAqparat – Jas talanttardy ǵylymǵa tartý boıynsha júıeli is-sharalar qabyldanýy qajet. Bul týraly QR Premer-Mınıstriniń orynbasary Altaı Kólginov aıtty, dep habarlaıdy QazAqparat tilshisi.

«Ǵylymdy keshendi damytýdyń negizgi alǵysharty – onyń kadrlyq áleýetin turaqty túrde qalyptastyrý. Jas talanttardy ǵylymǵa tartý boıynsha júıeli is-sharalar qabyldanýy qajet. Qabiletti jastardy mektep jasynan ǵylymǵa beıimdeý, olardy ǵylymı, ınjenerlik-tehnıkalyq jobalarǵa, ónertapqyshtyqqa baýlý jumystary júıeli túrde qolǵa alynýy kerek. Joǵary oqý oryndary, ǵylymı ınstıtýttar janynan ǵylymı-tehnıkalyq úıirmeler, fablaptar, ІT-klýbtar qurý mańyzdy. Ǵylym mınıstrligine Oqý-aǵartý mınıstrligimen birge osy baǵytta naqty usynystar ázirleýdi tapsyramyn», - dedi vıtse-premer QR ǵylym jáne joǵary bilim mınıstrliginiń keńeıtilgen alqa májilisinde.

Úkimet basshysynyń orynbasary kúrdeli ǵylymı zertteý toptarynyń quramyna stýdentterdi, magıstranttardy jáne jas ǵalymdardy tartý boıynsha talaptar engizýdi oılastyrý qajettigin basa aıtty.

«Sonymen qatar mınıstrlik halyqaralyq ǵylymı jobalarǵa qatysatyn jas ǵalymdardy qoldaýdyń arnaıy tetigin ázirleýi tıis. Memleket basshysynyń tapsyrmasyna sáıkes, iske asyrylyp jatqan Ulttyq ǵylym akademııasyn transformatsııalaý jumystaryn jýyq arada aıaqtaýymyz qajet. Máseleni jaqynda jınalysta talqyladyq. Barlyq másele naqtylanyp, kelisildi. Onyń nátıjesinde akademııa eldiń ǵylymı áleýetin bir arnaǵa baǵyttaıtyn jáne ony progressıvti túrde damytý boıynsha usynymdar ázirleıtin ortalyqqa aınalýy tıis», - dedi Altaı Kólginov.