Halyqaralyq ǵylymı-tehnıkalyq ortalyqtyń bas keńsesi Máskeýden Almatyǵa aýysady
ALMATY. 27 qyrkúıek. QazAqparat /Názıra Eleýhan/ - Halyqaralyq ǵylymı-tehnıkalyq ortalyqtyń (HǴTO) bas keńsesi Máskeýden Almatyǵa aýysady. Qazirgi ýaqytta daıyndyq jumystary bastalyp ketti. Bul týraly búgin Almatyda ótken arnaıy baspasóz máslıhatynda HǴTO basqarma keńesiniń tóraǵasy Ronald Leman myrza málim etti.
Onyń aıtýynsha, TMD-nyń 7 memleketinde qyzmet júrgizip otyrǵan uıym 2015 jylǵa deıin birtindep Reseıden barlyq operatsııalary men qyzmetkerlerin kóshirip alyp, ol jaqtaǵy jumysyn aıaqtaýdy josparlap otyr.
Halyqaralyq ǵylymı-tehnıkalyq ortalyq - 1994 jyldan beri TMD elderindegi ǵylymı-zertteý jobalaryn qarjylandyryp kele jatqan kommertsııalyq emes úkimetaralyq uıym. Uıymnyń maqsaty - TMD elderiniń potentsıalyn densaýlyq saqtaý salasy, bıotehnologııa, aýyl sharýashylyǵy, energetıka jáne jahandyq qaýipsizdik salalaryndaǵy ǵylymı-tehnıkalyq sheshimderdi qurýǵa baǵyttaý bolyp tabylady. Búginde Halyqaralyq ǵylymı-tehnıkalyq ortalyq 1995 jyldan beri júrgizgen qyzmeti aıasynda Qazaqstanǵa 65 mıllıon, al jalpy TMD elderine 850 mıllıon AQSh dollarynan astam qarajat bólgen.
Baspasóz máslıhatynda HǴTO basqarma keńesiniń tóraǵasy Ronald Leman myrza: «Biz qazaqstandyq ǵalymdarmen sońǵy 17 jyl boıy birlesip jumys jasap kele jatyrmyz. Osy ýaqyt ishinde olardyń kóptegen sala boıynsha júrgizgen zertteýleriniń joǵary deńgeıde ekenine kóz jetkizdik»,-dep atap ótti.
Ol sonymen qatar: «Biz Qazaqstannyń qarqyndy damyp kele jatqan el ekenin moıyndaımyz, sondyqtan qarym-qatynastyń aıasyn keńeıtip, qazaqstandyq ǵalymdarǵa Kanadadaǵy, Eýropadaǵy, Japonııadaǵy jáne AQSh-taǵy áriptesterimen budan da tyǵyz baılanysta bolýyna burynǵydan da múmkindikter jasaýǵa tyrysamyz», - dedi.
Qazaqstan Respýblıkasynyń Ulttyq ǵylym akademııasynyń prezıdenti Murat Jurynov HǴTO-tyń qazaqstandyq ǵylymǵa bergen úlesiniń mańyzy jaıly aıta kele, bas keńseniń bizdiń elge kóshýi memlekettik ınnovatsııalyq sektorǵa oń áserin tıgizetinin atap ótti.
