Halyqaralyq ǵarysh stansasyna - 20 jyl

ASTANA. QazAqparat - Osydan 20 jyl buryn, 1998 jylǵy 20 qarashada Baıqońyr ǵarysh aılaǵynan Halyqaralyq ǵarysh stansasynyń (HǴS) birinshi modýli - fýnktsıonaldyq júk blogymen «Proton» zymyran-tasyǵyshy ushyryldy. HǴS qurylysy dál sol kúnnen bastaldy, dep habarlaıdy «QazAqparat» HAA tilshisi.

HǴS basqarylatyn rejımdegi jumysyn 2000 jylǵy 2 qarashada bastady. Sol kúni «Soıýz TM-31» ǵarysh kemesi «Zvezda» qyzmettik modýlimen túıisti. HǴS-1 ekıpajynyń quramynda reseılik ǵaryshkerler ıÝrıı Gıdzenko men Sergeı Krıkalev jáne amerıkalyq ǵaryshker Ýılıam Sheperd boldy.

Ǵaryshty ıgerý tarıhyndaǵy asa mańyzdy halyqaralyq jobanyń 20 jyldyǵyna oraı, búgin Máskeýde «Ǵaryshkerlik (Kosmonavtıka): halyqaralyq yntymaqtastyq pen damýdyń ashyq keńistigi» atty ǵylymı-tájirıbelik konferentsııa jumysyn bastady. Oǵan QR Qorǵanys jáne aeroǵarysh ónerkásibi mınıstrligi Aeroǵarysh komıtetiniń tóraǵasy Erkin Shaımaǵambetovtiń basshylyǵynda Qazǵarysh delegatsııasy qatysyp jatyr.

Shara barysynda RF Prezıdenti Vladımır Pýtınniń quttyqtaý hatyn «Roskosmos» MK bas dırektory Dmıtrıı Rogozın oqyp berdi, dep habarlaıdy Roskosmostyń baspasóz qyzmeti.

«Búginge deıin HǴS-ta 18 memlekettiń ókilderi ǵaryshtanýdyń, álemdik ekonomıkanyń, ǵylym men medıtsınanyń damýyna asa mańyzdy zertteýler júrgizdi. Osynaý jahandyq ǵarysh jobasy saıası qaıshylyqtarǵa, ekonomıkalyq qıyndyqtarǵa, áleýmettik ózgeristerge qaramastan, tıimdi ári uıymshyldyqpen ete alatynymyzdy, ymyraǵa kele otyryp, kedergilerdi jeńe alatynymyzdy dáleldedi», - delingen jedelhatta.