Halyqaralyq ǵarysh stantsııasynda reseılik ǵarysh kemesiniń qaptamasyna zaqym keldi
Bul kemede ǵaryshqa reseılik ǵaryshkerler Sergeı Prokopev, Dmıtrıı Petelın jáne amerıkalyq astronavt Frenk Rýbıodan turatyn HǴS-68 uzaqmerzimdi ekspedıtsııasynyń ekıpajy attanǵan edi.
Kemeniń salqyndatý júıesindegi qysymnyń tómendeýi týraly dıagnostıkadan keıin reseılik ǵaryshkerler Sergeı Prokopev pen Dmıtrıı Petelınniń ǵaryshqa shyǵý jospary keıinge qaldyryldy. Keıinirek kemeniń salqyndatý júıesiniń syrtqy kontýrynyń qysymy tómendegeni anyqtaldy.
Reseılik ekıpajdyń úshinshi múshesi Anna Kıkına «Ǵylym» kópfýnktsıonaldy zerthanalyq modýline ornatylǵan manıpýlıatordaǵy kamerany paıdalanyp, kemeniń syrtqy betin sýretke túsirip, vıdeotúsirilim jasady.
VideoFromSpace jáne NASA arnalary da «Soıýz MS-22» kemesiniń termoregýlıatsııa júıesinen salqyndatqysh shyǵyp jatqan qorqynyshty vıdeokadrlary jelige jarııalady.
«Qazirgi ýaqytta barlyq HǴS júıeleri men kemeler shtattyq rejımde jumys istep tur, ekıpajǵa esh qaýip joq. Jaǵdaıdy taldaǵan soń, jerdegi mamandardyń da, HǴS reseılik segmenttiń ekıpaj músheleriniń de aldaǵy is-áreketi týraly sheshim qabyldanady», - dedi Roskosmos óziniń baspasóz habarlamasynda.
Bir kúnnen keıin Roskosmostyń baspasóz qyzmeti reseılik BAQ-ta «Soıýz MS-22» basqarylatyn kemesindegi temperatýra +50 gradýsqa deıin kóterilgeni týraly aqparatty joqqa shyǵardy.
«Juma kúni Máskeý mańyndaǵy ushýdy basqarý ortalyǵynyń mamandary reseılik ǵaryshkerlermen birge stantsııada «Soıýz MS-22» kemesiniń júıelerine birqatar test júrgizdi, onyń ishinde kemeniń túsý apparaty men turmystyq bólimindegi temperatýrany ólshedi, onda ol shamamen +30 gradýs boldy. Bul HǴS ekıpajynyń tehnıkasy men jaılylyǵy úshin mańyzdy emes, sonymen qatar ǵaryshkerlerdiń ómiri men densaýlyǵyna qaýip tóndirmeıtin shamaly ózgeris qana», - delingen habarlamada.
Roskosmostyń atqarýshy dırektory Sergeı Krıkalevtiń aıtýynsha, salqyndatqyshtyń syrtqa shyǵýyna kemeniń radıatoryna mıkrometeorıt túsýinen bolýy múmkin. Ekıpaj zardap shekken joq, ǵaryshkerler máseleni sheshý úshin jeldetý jumystaryn júrgizýde.
Qazirgi ýaqytta jerdegi mamandar HǴS ekıpajymen birge stantsııadan kelip túsken derekterdi, sonyń ishinde foto jáne beınetirkeýdi taldaýdy jalǵastyryp, týyndaǵan jaǵdaıdy salystyrýdyń túrli nusqalaryn ázirleýde.
Sonymen birge, NASA reseılik mamandardyń «Soıýz MS-22» qozǵaltqysh júıesin sátti synaqtan ótkizgenin rastady. Canadarm-2 robotymen kemeniń qaptamasyndaǵy jylystaý ornyn izdeý maqsatynda 18 jeltoqsan, jeksenbi kúni kemege zertteý jasalady.
HǴS-68 reseılik ekıpajynyń josparlanǵan ushý uzaqtyǵy – 188 kún. «Soıýz MS-22» kemesimen Jerge oralý 2023 jyldyń 28 naýryzyna josparlanǵan.
Sara Qabıqyzy
