Halyqaralyq fýtbol qaýymdastyǵy federatsııasynyń Álem kýbogy Qazaqstanǵa ákelinedi
ALMATY. Naýryzdyń 17-si. QazAqparat /Erlik Erjanuly/ - Almatyǵa sáýirdiń 16-18 kúnderi Halyqaralyq fýtbol federatsııasy qaýymdastyǵynyń Álem kýbogy ákelinedi.
Bul búgin Almatyda Qazaqstan fýtbol federatsııasynyń baspasóz máslıhatynda aıtyldy, dep habarlaıdy QazAqparat.
Ol 2-shi «Koka-Kola FIFA fýtboldan Álem kýbogy saparymen birge» sharasy aıasynda júzege asyp otyr. Dúnıejúzindegi №1 sport túri sanalatyn fýtboldyń Bas júldesimen jankúıerlerdiń bul kezdesýi 2009 jylǵy qyrkúıektiń 4-inde Halyqaralyq fýtbol qaýymdastyǵy federatsııasynyń (FIFA) shtab-páterinen bastalǵan bolatyn. 225 kúnge sozylatyn bul sapar kezinde jer sharyn 3 ret aınalyp shyǵatyn ara qashyqtyqty (134 myń 17 shaqyrym) basyp ótip, 2010 jyly mamyrdyń 4-i kúni Álem chempıonaty ótetin Ońtústik Afrıkaǵa jetkiziledi.
Bıiktigi 36,8 santımetr, salmaǵy 6,175 gramm bolatyn 18 karat taza altynnan jasalǵan FIFA Kýbogyn Álem chempıonatynyń jeńimpazy kelesi jarysqa deıin ózinde saqtaıdy. Marapatqa onyń túpnusqasyn emes, juqa altynnan jasalǵan kóshirmesin alady. Tuǵyryna 2 qabat baǵaly malahıt salynǵan Kýboktyń tastuǵyryna 1974 jyldan bergi jeńimpaz eldiń attary men ýaqyty oıyp jazylǵan.
«Álem kýbogy sapary alǵash ret 2006 jyly ótkizildi. Onda 102 myń 570 shaqyrym jerdi basyp ótken bul Kýbokty jankúıerler 29 eldiń 31 qalasynda tamashalaǵan. Bıyl onyń saparynyń qashyqtyǵy ǵana emes, ony óz kózimen kórý baqytyna ıe bolatyn elderdiń sany da aıtarlyqtaı ulǵaıyp otyr. Bul Qazaqstannyń fýtbol derjavasy retinde anyq jáne nyq qadam jasaýy. Bizdiń maqsat - Qazaqstan Álem chempıony bolmasa da ony osy shara arqyly Álem kýbogyn alyp kelý arqyly fýtbol dese ishken asyn jerge qoıatyn aǵaıynnyń qyzyǵýshylyǵyn odan saıyn arttyrý», deıdi «Koka-Kola» kompanııanyń Ortalyq Azııa elderindegi úkimetpen jáne qoǵamdyq baılanystar jónindegi menedjeri Arystanbek Nurmahanov.
