Halyqaralyq festıval elordalyq qazaq drama teatrynyń spektaklimen ashyldy
ASTANA. QazAqparat - Q. Qýanyshbaev atyndaǵy Memlekettik akademııalyq qazaq mýzykalyq-drama teatry «CHELoBEK TEATRA» V halyqaralyq festıvaline qatysty.
Elordalyq qazaq drama teatrynyń akterleri A. Chehovtyń «Shıe baǵy» komedııasynyń jelisimen spektakl qoıdy.
«Festıvalde usynylǵan «Shıe» spektakli úshin zor alǵys bildirgim keledi. Teatr osy festıvaldiń ashylymy boldy. Fantastıkalyq spektakl. Ondaǵy ár keıipker qısynsyz, biraq ómirdiń ózi sondaı. Spektaklde keremet ártister oınady, - dep baǵa berdi mádenıettanýshy Ksenııa Tývaltýxına.
«Shıe» spektakli tanymal teatr men kıno rejısseri, reseılik «Altyn betperde» ulttyq teatr syılyǵynyń ıegeri Sergeı Potapovtyń jetekshiligimen qoıyldy. Basty rólde «Zolotoı Vıtıaz-2015» Halyqaralyq teatr festıvaliniń dıplomanty Aqmaral Tanabaeva. Bul qoıylymda astanalyq qazaq drama teatrynyń úzdik akterleriniń ónerin tamashalaýǵa múmkindik bar, bul - Qazaqstan Respýblıkasynyń eńbek sińirgen qaıratkerleri Keńes Nurlanov, Qýandyq Qystyqbaev, Nurken Óteýilov, Aıman Aımaǵambet, «Daryn» jastar syılyǵynyń ıegeri Syrym Qashqabaev jáne t.b.
Chehovtyń shyǵarmasy keıipkerlerdiń azamattyq sharasyzdyǵyn, rýhanı qarama-qaıshylyǵyn, «maqsatsyz» sergeldeńin kórsetedi, olar óz álsizdikteri men kemshilikteriniń, jalǵyzdyqtyń tutqynyna túsip, ishki úılesimdilikterin joǵaltyp alǵan. Bul - ǵasyrlar toǵysyndaǵy kezeń úshin tán qubylystar. Komedııada rejısser Chehov keıipkerlerin ýaqyt pen keńistikten tys kúıde kórsete aldy.
«Shıe» elimizde 2016 jyly qoıylǵan úzdik spektakl sanalady, XXIV Qazaqstan teatrlarynyń respýblıkalyq festıvalinde ol Gran-prı ıelense, Ortalyq Azııa elderiniń IV Halyqaralyq teatr festıvalinde jeńimpaz atanǵan.
«CHELoBEK TEATRA» V halyqaralyq festıvaline qatysýǵa álem elderinen 90-nan asa teatr ótinish bergen. Muqııat irikteýden keıin festıvalde 17 úzdik spektakl qoıyldy. Shara Reseıdiń Chelıabi qalasynda ótti.
