Halyqaralyq festıvaldiń tórt bas júldesi batysqazaqstandyqtarǵa buıyrdy
ORAL. QazAqparat - Qaztalov aýdany Jalpaqtal aýylynyń balǵyn ónerpazdary Almaty qalasynda márege jetken «Jeti óner» І halyqaralyq balalar men jastar shyǵarmashylyq festıval-baıqaýynyń tórt birdeı bas júldesin jeńip aldy, dep habarlaıdy «QazAqparat» tilshisi.
Jas ónerpazdardyń jetekshisi, belgili ánshi-ustaz, «Eren eńbegi úshin» medaliniń ıegeri Baıan Qabıevanyń aıtýynsha, «Jeti óner» shyǵarmashylyq ortalyǵy (dırektory, joba avtory Sandýǵash Qurmanova) Elbasynyń «Qazaqstannyń úshinshi jańǵyrýy: jahandyq básekege qabilettilik» atty Joldaýyna sáıkes ónerli órenderdiń ózara saıysýyna múmkindik berip, sheberlikterin jetildirý maqsatynda uıymdastyrǵan baıqaýǵa respýblıka qalalary men óńirlerinen barlyǵy 700 oqýshy qatysyp, baq synady. Oǵan qosa Qytaıdan dombyrashy balalar keldi. Úsh kúnge sozylǵan festıval dástúrli án, estradalyq vokal, horeografııa, aspapta oryndaý, sheber qoldar, kórkem sóz, qoldanbaly óner, barlyǵy jeti atalym boıynsha ótkizildi. Onyń «Jeti óner» dep atalýy da sondyqtan. Ánder men shyǵarmalar úsh tilde oryndaldy.
Saıys qorytyndysynda Jalpaqtaldan barǵan «Qyz Jibek» termeshiler ansambli, Asqarovalar trıosy, Móldir Nuǵmanova jáne Kámıla Ramazanova dástúrli án atalymy boıynsha tórt bas júldege ıe boldy. Oǵan qosa Symbat Nyǵmetýllına ekinshi oryn alyp, laýreat atandy.
«Saparymyz Jeńis kúnimen tuspa-tus kelgendikten, 28 Panfılovshylar parkinde «Qyz Jibek» ansambli bir saǵat boıy kontsert qoıdy. Jınalǵan jurtshylyq ansamblge erekshe qoshemetin kórsetip, rıza boldy. Oǵan qosa festıval aıasynda «Jańartylǵan óner-bilim» birinshi respýblıkalyq semınar-trenınginde «Termede aqyl da bar, naqyl da bar» degen taqyrypta sheberlik saǵatyn ótkizdim. Osy saparǵa demeýshilik jasaǵan aýdan ákimi Nurlan Bekqaıyrǵa alǵysymdy bildiremin», dedi Baıan Qabıeva.
Aıta keteıik, «Qyz Jibek» termeshiler ansambli budan buryn da birneshe ret halyqaralyq baıqaýlardyń jeńimpazy atanǵan bolatyn.
