Halyqaralyq energetıkalyq agenttik munaı baǵasynyń quldyraýyna sebep boldy
ASTANA. 24 maýsym. QazAqparat - Halyqaralyq energetıkalyq agenttiktiń strategııalyq qor týraly málimeti munaı baǵasynyń arzandaýyna áser etti, dep habarlady RBK agenttigi.
Nıý-Iork bırjasynda Light Sweet munaıynyń baǵasy 4,39 dollarǵa arzandap, 91,02 dollar/barreldi qurasa, London bırjasynda Brent munaıynyń baǵasy 6,95 dollarǵa tómendep, 107,26 dollar/barrelge turaqtady.
Halyqaralyq energetıkalyq agenttik jaqyn kúnderi óz strategııalyq qorynan 60 mıllıon barrel munaı bóletinin habarlady. Jáne bul qordyń 30 mıllıon barreli AQSh qoryna tıesili. Agenttik Lıvııadan jetpeı jatqan munaıdyń ornyn toltyrý úshin aldaǵy 30 kún boıy naryqqa kún saıyn 2 mıllıon barrelden munaı jóneltýdi josparlaýda.
Agenttik bul sheshimdi munaı baǵasynyń ósýin toqtatý úshin qabyldap otyr.
