Halyqaralyq energetıka agenttigi 2050 jylǵa deıingi munaı baǵasyna boljam jasady

NUR-SULTAN. TASS-QazAqparat – Kómirtektik beıtaraptyq jónindegi jahandyq saıasat 2030 jylǵa qaraı munaı baǵasynyń barreline $36-ǵa deıin jáne 2050 jylǵa qaraı barreline $24-ǵa deıin tómendeýine ákeledi. Bul týraly Halyqaralyq energetıka agenttiginiń (HEA) World Energy Outlook 2021 baıandamasynda jazylǵan, dep habarlaıdy QazAqparat TASS agenttigine silteme jasap.

Alaıda, boljamnyń basqa stsenarııleri boıynsha, munaı baǵasynyń dınamıkasy basqasha bolady.
HEA óz baıandamasynda álemdik energetıkany damytýdyń úsh negizgi stsenarııine súıengen, olardyń árqaısysy klımattyq reformalardyń aýqymymen erekshelenedi. Munaı baǵasynyń barreline 24 AQSh dollaryna deıin tómendeýi Net Zero Emissions (NZE) stsenarııi kezinde bolýy múmkin. HEA mundaı strategııany júzege asyrý kezinde álemge jańa munaı men gaz ken oryndary qajet bolmaıtynyn túsindiredi.
Alaıda, baıandamadaǵy taǵy eki stsenarıı aǵymdaǵy baǵa dáliziniń 2050 jylǵa deıin saqtalýyn nemese tipti olardyń ósýin boljaıdy. Osylaısha, álemde kómirteksizdendirý boıynsha barlyq maqsattarǵa qol jetkiziletin Announced Pledges Scenario (APS) stsenarııinde munaıdyń ortasha baǵasy 2030 jylǵa qaraı barreline 67 AQSh dollaryn, al 2050 jylǵa qaraı barreline 64 AQSh dollaryn quraıdy. Stated Policies Scenario (STEPS) birqalypty boljamy boıynsha, úkimetter konservatıvti strategııalardy ustanatyn bolady jáne 2050 jylǵa qaraı barlyq qoıylǵan klımattyq maqsattarǵa qol jetkizilmeıdi, munaı baǵasy barreline 60-90 AQSh dollary dálizinde ózgerip otyrady.
Ekonomıkany kómirteksizdendirýdiń eń qatań stsenarıılerinde Reseı men OPEK elderiniń álemdik munaı óndirýdegi úlesi qazirgi 40% -ben salystyrǵanda kem degende 60% quraıdy, delingen atalǵan qujatta.